La Encortiechada d´El Bierzu

Apolízase una vacuna escontra’l VIH

2011-11-14T17:34:00.003+01:00

La melecina yía segura pa los voluntarios ya anicia una potente respuesta inmunitaria, pasandu asina la primer fas, la qu’endica que nun yía perxudicial. El llabor cola MVA-B (virus MVA con cuatro xenes del sotipu B del VIH) escomencióula l’investigador Mariano Esteban, del CSIC, ya la sua apricación en voluntarios llevóuse a cabu n’hospitales de Madrí ya Barcelona.
Lu qu’afala a los investigadores a siguir col trabayu yía que la nueva melecina yía quien a aniciare defensas, qu’apaeciorun nu 95 % de los 24 voluntarios, asoleyando los resultaos en “Journal of Virology Vaccine”.
Entovía deben continuare los ensayos en voluntarios sanos ya quiérse probar se la respuesta inmune qu’anicia la vacuna yía abonda pa que las presonas con VIH puedan acoutare la infición ensin tomar las melecinas a diariu. Eillu supón ensayare la vacuna non pa prevenire senón cumu tratamientu.

El grupu R.E.M desapártase

2011-11-13T02:10:00.003+01:00

La banda estaoxunidense diou anuncia de la sua dixebra tres más de trés décadas de carrera. Ensegún el comunicáu qu’engarabitorun na web, “cadagún cueye un camín con una gran sensación de gratitú ya de pasmu por tolu que fomos quien a facere”.
Tamién espresan “el nuesu más fondu agradecimientu por escuchanos” a tolos qu’en dalguna ocasión “se sintiorun apalpaos pola nuesa música”. Pola sua parte, el cantante Michael Stipe, mienta que cuandu ún va a una fiesta hai que sabere cuándu “yía houra de marchare”.
El cuartetu, que completan el guitarrista Peter Buck, el baxista Mike Mills ya’l batería Bill Berry, salíu a escena en 1981 con Radio Free Europe, axuntandu elementos de post-punk, pop ya música llariega norteamericana.

Alemaña pon fin al serviciu melitar

2011-08-06T20:27:00.002+02:00

El Parlamentu federal alemán (Bundestag) aprobóu la fin del serviciu melitar obrigatoriu en tiempos de paz. El grupu que sofita al gobiernu, la CDU, encontaos polos Verdes, foi gustante col exércitu profesional de voluntarios, dexando atrás el reclutamientu a la fuercia tres 55 años nas Fuercias Armadas xermanas.
La nueva medida amenorgará'l númaru d'efectivos melitares a 185000 soldaos ya dirá arimada a la desapaición de la emprestación social sostitutoria, el chamáu zivi, que dexará a hospitales ya outros servicios púbricos ensin l'axuda de los oxetores de concencia.

AT&T mercóu T-Mobile

2011-05-08T15:12:00.003+02:00

El grupu de telecomunicaciones AT&T, el segundu operador de telefonía móvil d'Estaos Xuníos, pagóu 27500 millones d'euros pa facese col control de T-Mobile, la filial norteamericana de móviles de Deutsche Telekom, anguañu la cuarta operadora na federación. Los conseyos de dambas robras forun gustantes cola operación.
Con aquesta operación AT&T quier postiare la súa rede p'agambare l'emburrie de Verizon Wireless, la premeira compañía de la estaya de los operadores móviles, ya que ta partecipada nun 50% por Vodafone. D'aquestamiente, Deutsche Telekom recibirá'l 8% del capital d'AT&T ya tendrá un puestu nu Conseyu d'Alministración de la compañía estauxunidense.
Mentantu, el nuevu grupu aspera enantare en más de 8000 millones las inversiones n'infraestructuras nos vinientes siete años. Son cuñecíos los problemas d'AT&T na rede de sou, con cayidas nas chamadas ya una velocidá de tresmisión de datos menor que la de los sous rivales.

L’atención al cliente tará apolizada por llei

2011-05-07T14:21:00.002+02:00

El Conseyu de Menistros foi gustante col anteproyeutu de llei de Servicios d'Atención al Cliente, qu'obrigará a las empresas qu'apurren servicios d'interés xeneral (augua, lluz, teléfanu, seguros, tresportes, etc.) a tenere teléfanos d'atención al cliente gratuitos, atendíos por presonal formáu ya durante l'horariu en qu'apurren el serviciu.
Anguañu los teléfanos d'atención gratuitos son el 15% del total ya nun yía fácil atopare'l númaru al que chamare, poru, la llei obrigará a las empresas a informare por escritu del sou teléfanu d'atención. La nueva llei tamién afalará que l'atención seya presonal, allindándose a un menutu l'emplegu de contestadores.
El Gobiernu tampoucu nun quier que s'allonguen las asperas, ya los carpíos ya pidimentos tendrán que recibire respuesta nun mes cumu másimu. Al tiempu, las empresas deberán afitare mecanismos pa que quede costancia de las queixas ya podere facere un siguimientu d'eillas.

Estrasburgu aveira’l crucifixu

2011-04-29T17:01:00.004+02:00

El Trebunal Europeyu de Dreichos Humanos cuida que las cruces nun violan el dreichu de los pas a educare a sous fiyos ensegún las súas convicciones. La sentencia yía inapelable ya da la razón a la Presidencia del Gobiernu italianu, qu'aprisentara en xineiru de 2010 un recursu escontra l'amparu de Soile Lautsi.
Soile Lautsi canióu en 2001 a la escuela onde estudiaban sous fiyos que retirara los crucifixos porque la súa presencia diba a la escontra de la llibertá relixosa. La direición de la escuela negóuse sofitada pol Menisteriu d'Educación ya Soile apresintóu un recursu ante un trebunal alministrativu de Vénetu.
La demanda foi refugada en 2005 yá que los xueces cuntorun que'l crucifixu yera un símbolu de la cultura ya hestoria italianas. El recursu de la muyer italiana al Conseyu d'Estáu touvu'l mesmu resultáu, asina que Soile Lautsi foi al Trebunal de Dreichos Humanos d'Estrasburgu qu'en 2009 ye-dióu la razon, enantias del recursu del Gobiernu italianu de 2010.

Febra óptica obrigatoria

2011-04-27T22:36:00.003+02:00

El Gobiernu asoleyóu'l reglamentu d'Infraestructuras Comunes de Telecomunicaciones nu que s'inxer que los nuevos edificios que s'anicien tean febra óptica ya cable coaxial, a mayores del par de cobre, cola fin de qu'haiga velocidades d'accesu superiores a los 100 Mbps.
Aquesti xeitu d'infraestructuras venceyan l'aniciu ya istalación nos edificios de llugares empobinaos a abellugare equipamientos de telecomunicaciones, canalizaciones ya outros elementos necesarios pa los cableaos interiores. Hasta eillos chegarán las redes espurridas polos operadores.
Aquesta infraestructura tien por fin apurrire a los ciudadanos el dreichu a accedere a cualisquier operador de telecomunicaciones qu'empreste serviciu, afitando la competencia ente eillos. Industria diz qu'eillu yía fondeiru pal desenvolvimientu social ya económicu del estáu, amás d'aportare actividá económica ya emplegu.

N’España hai cuatro millones d’emplegos añubríos

2011-03-31T01:40:00.004+02:00

Un informe de Funcas, la Fundación de Caxas d’Aforros, asoleya que la economía somorguyada supón el decisiete por cientu del PIB ya qu’hai cuatru millones d’emplegos agachupaos. Nel estudiu trabayorun trés profesores de la Nuversidá Rey Juan Carlos. Ensegún l’informe, que fina en 2008, dende 1980 dupricóuse el volumen de la economía oficial medida pol PIB, ente que la economía somorguyada lu fizu por cuatru. Eillu supón mermare los ingresos fiscales, que cifrorun nunos trenta mil millones d’euros anuales ente 1989 ya 2008.

La XE prohíbe que las muyeres paguen menos pol seguru del coche

2011-03-30T01:03:00.003+02:00

El Trebunal de Xusticia de la Xunión Europeya prohibíu que las aseguradoras estremen pol sexu a la houra d’albedriare las primas de seguros pol mor de que supón descriminación, ya la aplicación tará encesa de magar avientu de 2012. Las lleis europeyas nun permiten la descriminación por razón de sexu nu acceso a bienes ya servicios, onque hai una excepción que permite a los estaos autorizare difrencias nas primas ya emprestaciones de seguros se’l sexu yía un fautor qu’infine la evaluación del riesgo. Aquesta excepción yía la qu’anulóu’l Trebunal tres el pedimentu del Trebunal Costetucional de Bélxica, quien recibíu deillas denuncias d’asociaciones de consumidores. El Trebunal europeyu cunta qu’aquesti feichu yía “contrariu a la consecución del oxetivu d’igualdá ente homes ya muyeres”.

Volkswagen quíta-ye’l teichu al Golf

2011-03-30T00:47:00.002+02:00

La robra de Wolfsburgu torna a facere un cabriolet del Golf, que yá se daba por perdíu tres los modelos de 1979 ya 1993. Ñaciera l’Eos, con teichu terriu qu’acompañóu al Golf V ya que diba asumire la demanda de descapotaos ente los compautos de la marca. Na sesta xeneración del Golf el teichu yía de llona, automáticu ya mui rápidu, sobru un vehículu de cuatro plazas. Asina ya tou yía un coche silente, al que se-ye añeden barras antibaltu p’apurri-ye segurancia. Estrémase de la berlina na llinia del teichu, que yía más llampla; nu marcu del parabrisas, que tien más enclín; ya na parte traseira, escamudada. Pa emburrialu dispondráse de la gama de motores turboalimentados yá cuñecida de TSI ya TDI, con potencias que van de los 105 hasta los 210 cv. Mentanto, la tresmisión podrá facese a traviés de la caxa de cambios de doble embrague DSG. N’Alemaña yá ta a la venta, onque n’España habrá qu’asperare hasta’l branu, con un aforru respective al Eos d’unos 4000 euros.

La costrucción debe 446 millones a la Segurancia Social

2011-03-26T23:10:00.004+01:00

La estaya de la costrucción apruz por tolos requeixos de la crisis española. Aportóu más d’un millón de puestos de trabayu desaniciaos ya cuasi 100000 empresas. Amás, agachúpase tres el medru de la morosidá bancaria. Ensin el sapazu del lladrillu, la recuperación tarié encesu. Los sous efeutos chegorun hasta la Segurancia Social, a la que debe’l 26% de los 1714 millones d’euros atrasiaos que tenié l’estitutu púbricu nu cabu de 2010. Eillo supón que costructoras ya inmobiliarias deben una cantidá total de 446 millones. Javier Aibar, direutor xeneral de la Tesourería de la Segurancia Social, esprica que la costrucción tien un efeutu “d’arrastre”, pol mor de sere’l motor de bona parte de la industria manufacturera n’España. Nos aplazamientos de pagu asítianse, tres el lladrillu, la hostelería ya’l comerciu al por menor.

Xunión Mallorquina desaníciase pa escamudare

2011-03-17T18:32:00.002+01:00

La direición d'UM, partíu ñacionaliegu d'Isllas Baleares, tomóu la decisión de disolvese dispuéis de la prendida de dous ex-altos cargos, ún de los cuales quedóu en llibertá ensin cargos. El partíu ñacíu en 1983 quier asina repollecer col ñome de Converxencia polas Isllas Baleares p'aprexentase yá nas ellecciones del 22-M.
El llider d'UM, Josep Melià cuida qu'aquestas sieglas tan "creminalizadas ya estimatizadas", colos postreiros llíderes (María Antònia Munar ya Miquel nadal) imputaos ya fuera de la formación. A eillos añédense Cristina Cerdó que foi teniente d'alcalde de Palma, imputada pol casu "Picnic".
L'anterior coordinadora monecipal de Natura de Palma, Paula Cortés, tamién declarióu ante'l xuez, ya una ucena más de presonas, ente cargos intermedios d'UM ya empresarios averaos al partíu, foron prendíos. Por se fora poucu, la sede central de la formación foi rexistrada por un xuez ya dous fiscales.

La venta de pitos cai un 32,6%

2011-03-16T17:25:00.005+01:00

Los resultaos de la venta de paquetes de tabacu del mes de xineiru, el premeiru tres que tuviera encesa la llei antitabacu, asoleyan una merma del 32,6% al respective d'avientu de 2010, ensegún los datos del Comisionáu pal Mercáu de Tabacos del Menisteriu d'Economiya ya Facienda. Por premer ve'l númaru de paquetes vendíos nun mes baxa de los 200 millones.
El voceiru del Comité Nacional de Prevención del Tabaquismu cuida que las cifras son meyores de lu qu'asperaban. Aquestas tamién asoleyan qu'escamuda'l consumu de tabacu, por mor de que la venta del de febra ou'l de pipa enantóu nun 38%. Outru posibre efeutu de la llei, el del emplegu en cantinas ya ristoranes, medróu nun 0,2%, a la escontra del desaniciu de puestos de trabayu qu'albedriaban los hosteleros.

Escósanse las direiciones d'IPv4

2011-03-09T18:07:00.003+01:00

L'axencia qu'alministra las direiciones d'Internet escomencióu a apurrire los cabeiros paquetes col protocolu IPv4. A la IANA quedában-ye siete paquetes, con 16777216 direiciones cadagunu, de los que dous se solicitorun dende la rexón d'Asia-Pacíficu, una de las cincu fasteiras en que s'organiza'l repartu de los paquetes.
La rexón Europa-Oriente Mediu quedará ensin direiciones p'agostu d'aquesti añu, onque outras cumo África ou Llatinoamérica-Caribe tendrán direiciones hasta 2014. Eillo fai qu'haiga qu'aguantare a pasare a IPv6, cuyas direiciones son de 128 bits (escontra a los 64 d'IPv4), pa disponere lluegu de 340 sextillones de direiciones.
IPv6 tien más ventaxas técnicas ya añede nuevos servicios ya apricaciones más complexas, de las que nun s'esfrutará se l'amestadura a la rede se fai dende IPv4. Los sistemas operativos almiten IPv6 ya los routers seguirán furrulando, pero los proveedores d'accesu deben aviare las redes de sou pa que dambos protocolos s'atolenen ente sí.

Entama la minería somarina

2011-03-05T03:08:00.001+01:00

La minería comercial nu fondu marinu escomencióu cola premer concesión del mundu, en Papúa-Nueva Guinea, pa esplotar un yacimientu d’ouru ya cobre a 1600 metros de profundidá. La empresa encargada yía la canadiense Nautilus Minerals, que cheva deillos años faciendo prospeiciones ya estudios medioambientales.
El premisu apurríu a Nautilus pol gobiernu de Papúa-Nueva Guinea aporta-ye’l dreichu durante vente años a importare ya aniciare l’equipamientu necesariu ya a sacare, procesare ya vendere los minerales esplotaos. Nautilus albedria que’l yacimientu yía de 2,2 millones de toneladas, nunos depósitos venceyaos a zonas volcánicas marinas con una fauna mui bayurosa.
Dalgunos especialistas canian que la esplotación d’aquestos ecosistemas n’auguas internacionales s’atrasie hasta qu’haiga un marcu conservacionista llegal, onque Nautilus ya prometíu allindar una fasteira de reserva que sirva pa la repobración del llugar d’estraición cuando aquesta remate.

Renault asoleya’l Latitude

2011-03-05T02:38:00.006+01:00

Aniciáu pa mercase en tol mundu, ya nun sólu n’Europa occidental, d’ehí’l sou ñome. Yá cheva vendiéndose en Coreya del Sur cumo SM5, de Samsung, la filial de Renault nu país asiáticu. Aquesti afitóuse sobru la cadarma del Laguna, del que tien el tren delantreiru, escamudando’l traseiru por ún d’orixe Nissan.
Renault torna, con una gran berlina de 4,9 metros de llargu, a la estaya que dexóu tres el sapazu comercial del Vel Satis. El Latitude tien el tamañu d’un A6 onque empobináu a clases populares. L’interior ta bien rematáu ya tien un cientu de güecos pa dexare cousas, incluyendo una guantera refrixerada de 9,6 litros de capacidá.

El maleteiru yía grande, eigual que l’espaciu interior. En marcha yía confortable aesgaya ya ta bien aisláu acústicamente, afayadizu pa rodare por autovías a gran velocidá. Tocante al equipamientu, dispón de trés clases estremadas, pudiéndose añedi-ye, a mayores, faros de xenón, cámara de visión traseira, navegador ya asientos con masaxe.

Los motores son semeyaos a los del Laguna. Un gasolina de 140 caballos ya una amplia ufierta en diesel, de 150 ya 175 CV a los que se suma un poderousu 3.0 V6 dCi de 240 CV. Los precios escomienzan nos 24000 euros ya chegan hasta los 40000. Ta a la venta dende xineiru.

Católicos alemanes carpen por reformas na Eiglesia

2011-03-04T06:36:00.003+01:00

Más de 140 teólogos católicos d’Alemaña robrorun un manifiestu que pide una fonda reforma de la Eiglesia católica. Son intelectuales, homes ya muyeres de deillas nuversidades, ya seique hai más qu’en priváu son gustantes colas ideyas espresadas. Ochu d’eillos escribiorun el documentu ya las robras suponen un terciu del total de teólogos xermanos.
Nu testu vindícase la fin del celibatu obrigatoriu, l’inxerimentu de las muyeres cumo guíos espirituales ya la partecipación de los fieles na escoyeita de los oubispos. Trátase del carpíu más emportante escontra la tiesta de la Eiglesia dende va ventidóus años, cuando 220 teólogos robrorun la Declaración de Coloña, crítica col pontificáu de Xuan Pablu II.
El manifiestu fala d’un cientu de cousas, ya fai un chamáu a los oubispos pa un diálogu abiertu. Afitan los sous pidimentos en que la Eiglesia namás puede pedricare la pallabra de Xuasús “se eilla mesma yía llugar ya testigu del mensaxe de llibertá del Evanxeliu”. Esmolecen también pol refugu d’homosexuales ou divorciaos, “qu’allonxa” cada ve más a los creyentes.

Pertual anicia un centru de datos con balumbu

2011-03-02T01:21:00.001+01:00

El presidente executivu de Portugal Telecom, Zeinal Brava, falóu na apresentación d’aquesti proyeutu que se va aniciare na ciudá de Covilhã, al norte del estáu, cola fin de que Pertual tea “ún de los mayores centros de datos d’Europa”. La primer planta, con una inversión d’unos 40 millones d’euros, yá dispón de 45000 metros cuadraos.
El centru aniciará, albédriase, unos 500 emplegos, ya tará furrulando pal branu de 2012. Tará encontáu nuna rede de comunicaciones de febra óptica ya tendrá una capacidá d’almacenamientu de 20 Petabytes, aportaos por cuasi 50000 servidores.
Aquesta inversión yía una esixencia, ensegún Brava, ya que pa la fin d’añu 1,6 millones de viviendas pertuesas tendrán accesu a la febra óptica, asitiándose asina a la tiesta d’Europa. El proyeutu también supón l’aniciu d’un parque eólicu qu’aforrará 90000 toneladas de CO2.

Ismael Álvarez torna a apresentase

2011-02-27T22:53:00.005+01:00

Cuida que la xestión del untamientu de Ponferrada anguañu yía badanas ya sele, ya que nun hai comunicación cola xente, al tiempu que mienta que’l sou socesor salíu del sucu del proyeutu escomenciáu en 1995. Eillo puxóu a Ismael Álvarez a volvere a la política más d’ochu años dispuéis de que dexara’l cargu.
Tres intentare inxerise nas llistas del PP, pa lo que falóu con deillos derixentes del PP, foi refugáu pol presidente autonómicu del partíu, Juan Vicente Herrera, que-ye zarróu las puertas. Poro, aniciará una candidatura independiente na qu’habrá presonas “moderadas ya d’estremaos ámbitos idiolóxicos".
Álvarez agradecíu a las formaciones que, cumo Unión del Pueblo Leonés, ye-ufreciorun el númaru unu nas suas llistas. Amás de puxare porque Ponferrada espierte de lu qu'él ñoma "abandonu", quier da-ye un emburrión al emplegu ya a la Nuversidá de Llión, de la que diz que s’alcuentra "allancada" dende que marchóu en 2002.

La Menistra d’Esteriores, inxitada por israelines

2011-02-26T21:46:00.003+01:00

La Menistra d’Esteriores española, de vesita n’Hebrón, foi refugada con insultos por un grupu de manifestantes que-ye berrorun antisemita. Trinidad Jiménez afallábase na ciudá palestina, vindicada polos 800 colonos isralinos asitiaos neilla.
La titular de la diplomacia española fora a Hebrón pa vere los proyeutos d’aniciu de viviendas palestinas que financia l’Axencia española de facendera internacional. Aquesti llabor tienen la fin de que los palestinos vuelvan a asitiase na fasteira vieya de la ciudá, despobrada por mor de la violencia.
Los colonos israelinos de la ciudá ensiñorun pancartas nas que se siñalaba que va cincocientos años España eichóu a los xudigos, entrugando darréu s’España diba agora a eichalos d’Hebrón. La menistra nun-ye diou importancia al feichu, ente que’l sou ñeru israelí, Avigdor Lieberman, ye-pidíu perdonanza.

Afalláu un nuevu sistema solar

2011-02-05T04:19:00.003+01:00

Kepler-11 yía una estrella semeyada al Sol asitiada a unos 2000 años lluz de la Tierra. Na redondada d’aquesti astru descubríuse un sistema solar con seis planetas, cincu d’eillos pequeños, ya los astrónomos foron a infinire órbitas, masas, años, propiedades dinámicas ya composición d’eillos.
El sistema planetariu Kepler-11 yía’l de más balumbu alcontráu cola téunica del tránsitu, cola que se mide la merma de la lluz d’una estrella cuando un planeta se crucia na llinia de visión de la Tierra. L’afallu foi posible pol mor del telescopiu Kepler, de la NASA, que foi diseñáu a petu pa esqueirare ya ya estudiare planetas estrasolares.
Los centíficos de la NASA tamién atoporun col mesmu telescopiu espacial cinco posibres planetas del tamañu de la Tierra. Aquestos cuerpos tán na chamada fasteira d’habitabilidá, a una distancia de la sua estrella afallladiza pa que pudieran tenere augua llíquida.

Sony ya tien aviada la PSP 2

2011-02-05T03:23:00.000+01:00

La compañía xaponesa apresentóu la nueva xeneración de vidioconsola portátil, col ñome provisional de NGP (Next Generation Portable), que s’aspera un mercáu pa fines d’aquesti añu. Las duas cimeiras difrencias son la pantalla táctil de 5 pulgadas (la PSP tien 4,3) ya’l nuevu procesador, asina cumo amestadura a rede 3G.
A mayores tien dous sticks analóxicos ya un pad táctil traseiru que permitirá interactuar colos xuegos, sirviendo pa tocare, marrare, puxare ou tirare. Tien duas cámaras, una delantreira ya outra traseira ya tres sensores de movimiento, xiroscopiu, acelerómetru ya brúxula llectrónica, p’afondare nu xuegu.
Sony promete pa la NGP un puxu gráficu cuatru veces superior a cualisquier vidioconsola portátil d’anguañu. Eillo supondrá un rebincu na calidá de los xuegos, incorporando a la NGP versiones de “Killzone”, “Resistance”, “Metal Gear Solid” ou “Call of Duty” qu’anguañu namás taban a l’altura de sistemas cumo Xbox 360 ya PlayStation 3.

Equo quier facese un güecu pa las xenerales

2011-02-04T04:24:00.002+01:00

La fundación Equo, furmientu d'un partíu ecoloxista que llidera Juan López Uralde, ex-direutor de Greenpeace, apresentóuse en Madrí col arimu de los voceiros de los verdes nu Parlamentu Europeyu, Mónica Frassoni ya Daniel Cohn-Bendit. Uralde dixo que “yía difícil aniciare una fuercia política” pero que n’España hai una cachapáu verde “que medra”.
Pola sua parte, Cohn-Bendit mentóu qu’Equo yía necesariu porque la esquierda “nun tien nin ideya de la crisis ecolóxica”, ya puso cumo exemplu d’eillo al presidente del gobiernu José Luis Rodríguez Zapatero. Cuntóu qu’IU “tampoucu nun da la respuesta correuta” ya, de miente xeneral, que los desenguedeyos pa cola crisis de la esquierda “nun furrulan”.
La italiana Frassoni, presidenta del Partíu Verde Europeyu, muéstrase abangada pol cambiu dáu pol gobiernu socialiegu ya diz que los Verdes, siendo la cuarta fuercia nu Parlamentu Europeyu, nun se pueden permitire nun cuntare con un partíu de balumbu n’España.

Va investigase la muerte de Salvador Allende

2011-02-04T02:26:00.002+01:00

La fiscal de la Corte d’Apelaciones de Santiagu apresentóu 726 querellas polas víctimas de violaciones de dreichos humanos ocurridas ente 1973 ya 1990, ente las que s’alcuentra’l casu del ex-gobernante. La muerte de Salvador Allende, ocurrida’l 11 de setiembre de 1973, nun ta clara entovía, nun se sabe se foi asesináu polos melitares golpistas ou se se suicidóu.
Denguna de las duas versiones yía la oficial porque nunca houbo una investigación xudicial sobro lo asocedíu aquel die nu Palaciu de la Moneda. El casu abiertu agora vien pola apertura d’un procesu l’añu pasáu por parte del maxistráu Sergio Muñoz, que foi ñomáu coordinador de tolos casos venceyaos con violaciones de dreichos humanos durante’l réxime de Pinchet.
Los poucos que sobroviviorun aquél 11 de setiembre dixorun qu’Allende foi asesináu polos melitares que forun a entrare nu palaciu. Sicasí, años despuéis, el mélicu presonal del presidente espricóu que’l gobernante decidióu suicidase pa que nun lu prendieran.

El Senáu francés refuga la eutanasia

2011-02-02T01:26:00.002+01:00

Albedriábase un alderique calecíu nu Senáu francés sobro’l dreichu a morrere, la regulación de la eutanasia, pero unas houras enantias de qu’escomenciara la sesión dous senadores conservadores inxertorun una enmienda que borria de la llei de cuidados paliativos el premer artículu.
Aquesti artículu recuñecíe’l dreichu de “toda persona, en fas avanzada ou terminal d’una enfermedá grave ya incurable, que-ye deya un sofrimientu físicu ou psíquicu que nun seya a soportare” a pidire “asistencia mélica cola fin de procurase una muerte rápida ya ensin dolor”. Las encuestas asoleyan qu’un 94% de la pobración francesa yía favoratible cola eutanasia.
El premer menistru, el conservador François Fillon, mienta que “la tema consiste en sabere se la sociedá ta en condiciones de llexislare la muerte. Peme qu’aquesa llinde nun se debe sobropasare”. Los progresistas nun lu tienen tan claru. Ente que la socialiega Ségolène Royal mostróu “grandes reservas”, Martine Aubry, premer secretaria del PS yera favoratible col artículo.

IBM yá festeixa los sous 100 años

2011-01-29T23:08:00.002+01:00

IBM (International Business Machines) festeixará pa sanxuán el sou 100 cabu d’añu cumo empresa, onque ya asoleyóu los sous fitos nu site de la compañía ya fizo un documental que s’afalla engarabitáu na rede.
IBM anicióuse en 1911 tres l’amestadura de tres compañías dedicadas a sistemas de xestión con tarxetas esfuracadas. Asina ya tou, nun foi hasta la II Griesca Mundial cuando la compañía s’inxertóu dafeichu nu mundu de los ordenadores, asoleyando en 1953 el sou premer gran ordenador afitáu sobro válvulas de vacíu, escamudadas en 1959 por transistores.
En 1981 IBM anicióu’l premer ordenador personal ya encargóu a Microsoft el sistema operativu pal equipu, afalando’l puxu de la compañía de Bill Gates. En 2004 vendíu la estaya d’ordenadores presonales a la china Lenovo, dedicándose dende entoncias a la venta d’una gran variedá de servicios informáticos.

Fitos d'IBM

Documental d'IBM

China ya yía’l premer mercáu de GM

2011-01-28T22:38:00.002+01:00

Con 2,35 millones de vehículos vendíos nu país asiáticu en 2010, yá porriba de los 2,22 n’Estaos Xuníos, General Motors avérase a Toyota n’aniciu de vehículos, tando namás desapartaos por 30000 unidades. GM, cola fin de repollecere de la suspensión de pagos, puxóu polos mercaos emerxentes, que l’axudorun a enantare las ventas nun 12% al respective de 2009.
Brasil foi el tercer mercáu pal grande de Detroit, ya ente los diez premeiros afállanse Rusia, Méxicu ya Uzbekistán. Ente tous empericotorun a GM hasta los 8,39 millones de vehículos vendíos l’añu pasáu, unos resultaos colos que los sous derixentes asperan tare de nuevu por delantre de la compañía xaponesa Toyota.

Adebayor xugará nu Real Madrid

2011-01-26T22:09:00.002+01:00

El Madrid obtuvo la cesión d’Emmanuel Adebayor, delantreiru togolés del Manchester City, tres refugare l’Hamburger la del sou xugador holandés Ruud Van Nistelroy. D’aquestamiente’l club madrilanu aportará la mitá de la ficha del xugador hasta’l mes de sanxuán, ya podrá mercalu pal branu.
Afítase asina’l pidimentu de José Mourinho, que piaba por un punta tres la mancadura d’Higuaín ya la falta de puxu de Karim Benzema. El xugador togolés, que tien 26 años, yía rápidu ya manexa guapamente’l balón colos dous pías, onque nun-ye suel dar cola tiesta, magar la sua altura de 1,91 m.
Adebayor namás xugóu 14 partíos hasta va dous meses, cuando s’allióu col sou ñeru Touré nun entrenamientu del que foi espulsáu. Tamién touvo un xaréu col entrenador al entamu d’aquesta temporada. Chegóu al Manchester City en 2009 dende l’Arsenal, col que fizo 56 goles en cuatro temporadas. En 2008 foi balón d’ouru africanu.

Rafael Videla cundenáu a cadena perpetua

2010-12-23T21:30:00.002+01:00

L’antañu xeneral, de 85 años, foi cundenáu pol asesinatu de 31 prendíos nuna cárcel, ya vindicóu, nu alegatu final del xuiciu, una “griesca xusta” escontra los comandos qu’actuaban n’Arxentina na década de los setenta. Tamién añedíu que la sociedá d’entoncias sofitóu’l güelpe de 1976, ya que “los ñemigos d’ayer güei gobiernan el país”.
Yía la segunda ve que yía cundenáu polos crimes del sou réxime, que fizo desapaecere a 30000 presonas. La premera foi nu xuiciu a las Xuntas Melitares en 1985, pola responsabilidá pa colos actos de terrorismu d’estáu durante la sua gobernanza, onque en 1990 foi indultáu pol presidente Ménem. L’ex-dictador asitiará en prisión, asperando nuevos xuicios.

Polanski allampia nos Premios del Cine Europeyu

2010-12-10T04:10:00.002+01:00

“L’Escribidor”, del cineasta polacu, marchóu con cuasi tolos premios a los qu’aspiraba de la fiesta de los 23 Premios del Cine Europeyu, ateichada pol Nokia Concert Hall de Tallin (Estoña). Aquestos premios organízanse pola Academia del Cine Europeyu ya abultan sere los Óscar d’Europa.
“L’Escribidor” yía una película sobro la doble moral, la corrupción política, las trangalladas ya las abadías de los derixentes políticos, naquesti casu, a cuenta de la partecipación del Reinu Xuníu na postrer griesca d’Irak. El film atropóu, ente outros, los premios al meyor guión, direición, actor prencipal ya película.
Roman Polanski, que nun foi a Tallin pol alcuerdu d’estradición ente Estoña ya Estaos Xuníos, agradecíu los premios, por vidiuconfrencia, a los sous ñeros d’equipu. D’outramiente el chilenu Patricio Guzmán ganóu’l premiu al meyor documental por “Murnia de Lluz”, que dedicóu a las muyeres del sou país, “entovía víctimas de la dictadura de Pinochet”.

Google Earth, entovía más rial

2010-12-08T05:02:00.002+01:00

Google apresentóu una nueva versión del sou atlas dexital, Google Earth 6.0, col que s’inxertan Google Earth ya Street View, ameyorando aquesti, ya dando volume 3D a los árboles. Agora tamién yía más fácil esplorare imáxes hestóricas.
A mayores de los edificios apolizaos en trés dimensiones, muéstranse 80 millones d’árboles de una ucena d’especies estremadas, de deillas ciudades del mundu. P’acolumbralos, hai qu’activare la capa d’edificios tridimensional nu panel esquierdu de l’apricación.
Google Earth 5.0 ya ufrecié la posibilidá de vere imaxes hestóricas en llugares importantes. Agora, puédense vere tamién faciendo click nas fechas qu’apaecen na parte baxeira de la pantalla, remanando asina tolas afotos d’una fecha infinida.

Nuevu Street View

Árboles en 3D

L’estáu xube’l tabacu

2010-12-07T01:50:00.001+01:00

Dientro del postrer plan d’axuste que tien por fin mermare’l déficit ya acallentare los mercaos de deuda, inxérse una xubida de los impuestos del tabacu del 24%, cola que s’aspera atropare unos 780 millones d’euros más al añu. Eillo siempres que nun baxe’l consumu pol mor de la nueva llei que prohibirá fumare en cantinas ya ristoranes de magar el dous de xineiru.
Con aquesta midida quiérse agambare la pérdida d’ingresos que s’albedria cola merma de la fiscalidá sobro las pymes ya l’aumentu de la inversión pal aniciu del emplegu. D’aquestamiente la xubida media será de 25 céntimos por caxetilla, lo que supondrá enantare’l preciu nun 7,2%. La mayor xubida va dase nu tabacu de lliare, con un aumentu mediu de 65 céntimos.

Pantallas táctiles con testura ya relieve

2010-12-06T02:02:00.003+01:00

Una patente rexistrada por Microsoft torna las pantallas táctiles en paneles qu’emiten relieve ya tienen la capacidá d’ufrecere testura. Eillo faise pol mor d’un sistema de cámaras que deteutan cuando’l déu s’avera, ya anician la testura modulando las llonxitudes d’onda de lluz.
La pantalla, al sere apalpada, deteuta los rayos infrarroxos de la dea. Amás, el dispositivu tien una capa con un polímeru que paña las formas afaladas pola lluz, asina, cuando una llonxitú d’onda de lluz ultravioleta se tresmite a un píxel, el sistema anicia protuberancias en dalgunas partes, ya suaviza outras con llonxitú d’onda estremada.
Microsoft, asitiada en Redmond, aguantóu a rexistrare la súa propuesta enantias de qu’outros se-ye adelantraran. El sou sistema nun ta empobináu a pantallas pequeñas, senón a las d’ordenadores ou a las proyeutadas en superficies, faciendo más fácil la identificación de las apricaciones ya los accesos direutos.

Améstase’l cielu europeyu

2010-12-05T00:22:00.003+01:00

Cincu estaos miembros de la XE (Alemaña, Francia, Bélxica, Países Baxos ya Lusemburgu), a mayores de Suiza, forun gustantes n’aniciare’l Bloque Aéreu Operativu común d’Europa Central (FABEC, nas suas sieglas n’inglés). Aquesta yía la tercer estaya aérea común, espués de las yá afitadas a comuña por Reinu Xuníu ya Irllanda, d’un llau, ya Dinamarca ya Suecia, d’outru.
Los estaos van axuntare los sistemas téunicos ya faerán furrulare una infraestructura de comunicación, navegación ya supervisión común. La fin yía ameyorare la xestión del tráficu aéreu ya encurtiare los vuelos. La estaya aérea tará xestionada por un conseyu d’alministración nu que parteciparán tolos estaos miembros.
El comisariu europeyu de Tresportes, Sim Kallas, allegróuse d’aquesti alcuerdu, porque cuenta qu’afala que l’espaciu aéreu europeyu nun teya tan escacháu, al tiempu que lu califica de “pasu emportante” p’averase a un cielo únicu europeyu.

L'alfabetización dexa buelga nu celebru

2010-11-18T03:29:00.003+01:00

La revista Science acaba de pubricare l’informe col esprimentu feichu pola Nuversidá París-Sur a 63 voluntarios brasilanos ya pertueses. Usando técnicas de resonancia funcional forun a infinire los efeutos de l’alfabetización nu celebru.
Once de los soxetos yeran analfabetos, 37 alfabetizórunse de neños ya 22 siendo paisanos. Asina infiniorun las fasteiras del celebru moduladas na alfabetización, que tan en rexones ya cuñecidas pola sua especialización nu vocabulario ya’l recuñecimientu de caras.
Stanislas Dehaene ya los sous ñeros encalcan nu informe que las difrencias nu celebru de las presonas analfabetas ya las que nun lo son son bultables, ya viorun que la educación seronda yía a apolizare fondamente la organización de la corteya celebral.
Nu esprimentu apresentórunse a las 63 presonas cernidas llabores de recuñecimientu de caras, problemas de cálculu ya respuesta a frases ouyías ya lleídas. Los centíficos mientan que l’alfabetización puxa la respuesta del celebru d’estremadas formas.

La postrer edición d’Assassin’s Creed chega a Navarra

2010-11-17T01:00:00.003+01:00

Namás nun añu desenvolviorun Assassins’s Creed La Hermandad, la tercer estaya de la riestra de monxes asesinos ya los sous ñemigos templarios. Podráse esfrutare en PS3 ya Xbox 360 ya darréu en PC, ya los resultaos d’aquestos infinirán se apaez nas consolas portátiles.
Eigual que na segunda estaya, el florentinu Ezio Auditore yía’l protagonista, ya nu sieglu XVI, d’una aventura qu’escomienza en Roma ya chega a Viana. A la familia de los Borgia cumo centru de l’acción, añédense presonaxes hestóricos cumo Maquiavelo ou Catalina Sforza.
Jeffrey Yolahem, guionista de la riestra mienta “qu’intentorun espeyare la riqueza de la hestoria en cada episodiu”, ya que se tienen esforciáu “colas recostrucciones ya las recreaciones”, al tiempu que considera acoutáu que’l xuegu teya etiquetáu pa mayores de deciochu años.

Italia carpe pola cultura

2010-11-16T02:34:00.004+01:00

La cultura italiana bullíu la postrer selmana escontra los encurties del gobiernu, pechando llugares arquiolóxicos ya bibriotecas col eslogan “Puertas trancadas, lluces prendidas sobro la cultura”. Dalgunos museyos tamién zarrorun, onque outros dexorun entrare gratis, ya hóubolos qu’añubriorun dalgunas oubras con sábanas.
El carpíu foi aguyáu pol esbarrumbe de la Casa de los Gladiadores de Pompeya, la ciudá que quedóu terria pol mor del borrallu ya las pubisas del Vesubiu. Aquesta yía la muestra del estáu de llaceria de los refugos arquiolóxicos, de Pompeya en particular ya d’Italia en xeneral, que suponen el 80% de los bienes culturales aveiraos pola UNESCO.
El gobiernu cuenta mermare nunos 280 millones d’euros el presupuestu cultural pa los dous prósimos años, añedíos a los 800 millones menos qu’invertirán los untamientos. A mayores, pal die 22 ta convocada una fuelga xeneral del espectáculu, que trancará teatros ya na que nun habrá rodaxes nin postproducción denguna.

Acolúmbrase la fin del roaming

2010-11-14T21:39:00.002+01:00

España ya Pertual cuntan falare nu entamu del añu que vien, pol mor del cume ente los dous estaos, de la eliminación del roaming ente dambos, cola fin de que las chamadas ente eillos tengan el mesmu coste qu’una chamada nacional.
El roaming supón un tarifa extraordinaria que se cobra cuando dalquién viaxa a outru estáu ya fai una chamda ou envía un mensaxe de testu. La ideya salíu del gobiernu autonómicu estremeñu, ya foi recoyida pol embaxador español en Pertual, Alberto Navarro.
El dipromáticu yá puxó pa qu’aquesta tema teya inxerida na axenda del prósimu alcuentru ente los dous estaos n’Elvas. La eliminación del roaming hispanu-pertués nun será facil, ya que la llexislación europea albedria la sua supresión en cinco años.

La Bibrioteca Nacional xubila’l microfilme

2010-11-14T21:18:00.002+01:00

La BNE dexará d’usare’l microfilme en 2011 cola fin de dexitalizare los archivos en xeitu TIFF, qu’amás tien las ventaxas de que se-ye puede inxertare etiquetáu ya información pa la documentación del archivu, a mayores d’enantare la definición.
La opción dexital garantiza tanto la divulgación cumo la preservación d’orixinales en peligru, cumo los llibros en papel acéu, que colos soportes analóxicos nun tan seguros. D’outramiente, l’escáner yía a atropare la testura del soporte analóxicu ya los tonos del orixinal, ya permite recuperare datos estropiaos.

MGM suspende pagos

2010-11-13T20:38:00.002+01:00

Los afamaos estudios de Hollywood esqueiran asina amenorgare la sua deuda, que chega a los 2852 millones d’euros, apurriendo la solicitú necesaria nun tribunal federal de Manhattan. Eillo asocede tres vese obrigada a dexare pa práu dalgunas producciones.
Acuéyese la compañía al capítulu 11 de la llexislación norteamericana de bancarrota, pa que seya un xuez el qu’amire pol llabor d’estructuración de MGM. Aquesti llabor supón la merma d’una deuda que ta en manos de dalgunas entidades cumo JP Morgan Chase ya Credit Suisse.
Al frente de la xeira asitiaráse Stephen Cooper, cuñecíu por desaniciare la lléctrica Enron, centru d’un tracamundiu en 2001. Cola merma de la deuda afallaráse la entrada de capital priváu, ya albédriase que MGM seya xestionada pola productora Spyglass Entertainments.

Xermaña escaez la crisis

2010-10-23T05:11:00.002+02:00

L’estáu xermanu escomienza a remanare de la murnia na qu’entovía somorguyan los demás estáos de la XE. Onque’l menistru de Facienda, Wolgang Schäuble, alvierte que “inda nun salimos de la crisis”, los númaros dicen outra cousa: cai el paru (de 3,4 a 3,2 millones), merma’l déficit ya albédriase que pa la fin d’añu’l PIB tendrá medráu más d’un 3%.
Aquesti medru yía’l mayor dende l’amecedura de la RFA ya la RDA, sofitáu na industria de maquinaria ya materiales que puxa pol mor de las ventas nos mercaos emerxentes. Las esportaciones de coches, la xoya de la industria xermana, xubiorun un 41% hasta’l mes de santamarina.
Deillos especialistas n’economía encalcan que, por exemplu, BMW nun afalla abonda xente pa trabayare, ente que los sueldos xuben ya con eillos el consumu d’interior. Asina ya tou nun hai esfoutu nas esportaciones a la eurozona, que suponen el 40% del total, colos ñeros europeyos abangaos.

El Congresu nun quier que se fume nos llugares zarraos

2010-10-21T03:15:00.001+02:00

La Comisión de Sanidá del Congresu de los Deputaos aprobóu la proposición de llei que terria la regulación del tabacu d’anguañu ya que prohíbe fumare en tolos llugares púbricos zarraos ya en dalgunos albentistate. El testu escomienza agora’l trámite nu Senáu ya aspérase que teya encesu pal dous de xineiru del añu que vien.
La Comisión de Sanidá inxertóu nu testu un chamáu pa que los tratamientos pa dexare de fumare seyan financiaos pol Sistema Nacional de Salú, onque aquesta decisión la tien qu'adoztare'l Conseyu Interterritorial de Salú, qu’aconceya al Gobiernu central ya a los conseyeiros de Sanidá de las estremadas autonomías.
Se la llei sal del Senáu eigual qu’entra, nun se podrá fumare en dengún centru escolín, incluyíos patios, nin nas zonas de neños nos parques. Tampoucu nas istalaciones sanitarias nin na redondada d’eillas. A la fin nun habrá llugares afalladizos pa fumadores en cantinas ya ristoranes, cola fin d’aveirare a los emplegaos d’hostelería.

El PP sal del gobiernu canariu

2010-10-20T05:11:00.002+02:00

Asocedíu pol alcuerdu de los sous ñeros nu gabinete autonómicu, los nacionaliegos de Coalición Canaria, col gobiernu socialdemócrata del estáu. CC diz que’l Partíu Popular pon los sous intereses por delantre de los canarios ya’l PP nun quier encontare a un grupu que “sofita un executivu que se mantién artificialmente”.
El PP añede qu’asina “se-ye paga l’alquiler nu Palacio de La Moncloa un añu más" al gobiernu del PSOE. El presidente canariu quier que la escachadura del pautu seya a modu, al tiempu qu’estudia cumo escamudare’l gobiernu autonómicu, del que marcharán los conseyeiros conservadores.
La voceira de CC nu Parlamentu del estáu, Ana Oramas, mienta que “consiguiorun vindicaciones de va trenta años” ya encalca que tamién houbo pautos col PP a nivel estatal ya que nun pueden chegare a alcuerdos con unos ya con outros non.
Tou eillo vien pol alcuerdu robráu pol PSOE con PNV ya CC pa sofitare al gobiernu no que queda de llexislatura. D’aquesta miente, PNV obtién pal gobiernu vascu tolas competencias pendientes nu Estatutu de Guernica, ente que Canarias verá enantadas las inversiones n’infraestructura, cencia ya teunoloxía, a mayores d’afalare l’aniciu d’emplegu nas isllas.

Esfuracáu’l túnel más llongu del mundu

2010-10-20T01:14:00.003+02:00

Esfuracórunse dafeichu onque entovía nun se rematorun los 57 km que van porbaxu los Alpes ya qu’amestarán Zurich ya Milán en duas houras ya media, dispués de 20 años d’oubras que tienen costáu 13000 millones d’euros. Eillo supón un record al quedare porriba de los 54 km del túnel xaponés de Seikán, tres esbarroucare la máquina Sissi los cabeiros 180 cm de piedra que quedaban p’abrire’l tunel nu llau que da a la fasteira suizu-italiana de Tesinu.
El llabor tien síu duru pol mor de la presión ya las altas temperaturas d’un túnel asitiáu a 2000 m baxu tierra, d’ú remanan cuetos d’hasta 3000 m d’altura. La fin de la oubra yía añubrire tol tresporte de mercancías p’aveirare la natura del pasu de camiones que dexaban nas brañas suizas 130000 toneladas de CO2 ya 840 de ferruñu de nitróxenu.
El ñomáu túnel de San Gotardo, santu de los puertos de montaña, tará abiertu pal 2017 ya emprestará serviciu a 20 millones d’habitantes del sur d’Alemaña ya Suiza ya’l norte d’Italia, albedriándose que seya transitáu por 300 trenes diarios d’alta velocidá.

Ensin corazón namás seriémos máquinas

2010-10-18T06:29:00.004+02:00

Asina anúnciase l’Alfa Giulietta, que yá anda polas cais ya vien a asocedere al 147 nuna dura estaya na que tamién tán Mègane, Golf, Astra ou 308. Namás ta albedriáu anicialu con cincu puertas colos tiradores d’atrás sometíos, eigual qu’el Seat León, ya cheva’l ñome que touviorun outros Alfa nos años 50 ya 70.

La parte d’alantre tien la matrícula pequeñina, rexilla con xeitu de nial d’abeya ya lluz LED, cumo los aguzáos faros d’atrás. L’interior remana deportividá aesgaya, colos mandos amontonaos nu centru ya con güecos por demás, quedando rematáu con una calidá averada a la d’un A3 ou un Serie 1. Los precios van dende 21070 hasta 30400 euros.

La cadarma afítase sobro una nueva arquiteutura ñomada “Compact”, más llixera ya terria qu’inxer cambios na direición ya las suspensiones. Aquestas pueden escamudase, eigual qu’el furrulamientu del cambiu, del motor ou del control d’estabilidá, col sistema Alfa DNA. Podráse escoyere trés acabaos ya cinco motores, tres de gasolina (120, 170 ya 235 cv) ya dous diesel (105 ya 170 cv).

Site d'Alfa Romeo

Nobel de Física pol llabor col grafenu

2010-10-17T22:22:00.002+02:00

Andre Geim ya Konstantin Novoselov, centíficos de la Nuversidá de Manchester (Ingraterra), forun estremaos aquesti añu col Premiu Nobel de Física “polos sous esperimentos fundamentales sobro’l material bidimensional grafenu”, ensegún anuncióu’l Comité Nobel de l’Academia de las Cencias de Suecia.
El grafenu yía una llámina de carbonu d’un átomu de grosor sobro la que Geim ya Novoselov, dambos ñacíos en Rusia, demostrorun propiedades aniciadas na física cuántica. Aquesti nuevu material, delgáu ya terriu por demás, afala la llectricidá eigual qu’el cobre ya’l calor cumo dengún outru material cuñecíu. Yía cuasi tresparente ya nun puede sere trespasáu nin con heliu, l’átomu de gás más pequeñu.
Geim ya Novoselov aniciorun el grafenu con grafito normal, del que se forun cerniendo capas hasta que namás quedóu una. Pol mor de las suas propiedades acolúmbranse-ye un cientu d’apricaciones en pantallas ou en paneles solares. Barrúntase al tiempu que transistores aniciaos con grafenu pueden sere más rápidos que los d’anguañu, feichos con seliciu, lo que dará un nuevu puxu a la llectrónica.

Europa encamienta pa Internet las frecuencias de la TV analóxica

2010-10-17T19:33:00.003+02:00

El rebinco a la televisión dexital terrestre lliberóu frecuencias que Bruselas quier que los estaos comunitarios, nu plazu de dous años, empobinen pal accesu a Internet. Asina la banda de 800 megahertzios, usada hasta va poucu pa TV ya GSM, usaráse pa que los operadores d’Internet espurran redes inalámbricas qu’añubran fasteiras ensin accesu a banda ancha.
La Comisión Europeya quier que la tasa mínima d’accesu pa 2020 seya de 30 Mbsp obrigando a los operadores d’Internet a aniciare redes inalámbricas d’hasta 40 km d’alcance qu’averen la banda ancha a las fasteiras onde nun chega entovía l’ADSL.
La Xunión Europeya de Radiotelevisión nun yía gustante cola midida porque tarrez que las frecuencias de la siñal audiovisual seyan interferidas. Asina ya tou la CE da dous años a los estaos pa lliberar frecuencias qu’amás servirién p’afalare la cuarta xeneración de telefonía móvil.

Westergaard premiáu

2010-09-26T16:52:00.002+02:00

Kart Westergaard, el debuxante de la caricatura de Mahoma con una bomba nu turbante, recibíu’l Premiu de la Prensa Europeya apurríu pola presidenta del gobiernu alemán, Angela Merkel. Westergaard, de 75 años, tien síu acenáu un cientu de veces por mor del sou debuxu satíricu, que pa muchos yía un símbolo de llibertá de crítica ya opinión ya pa outros yía una zalampernia ufiensa relixosa.
Nu discursu del entamu Merkel encalcóu delantre de westergaard que “el secretu de la llibertá yía la bravura”. Nuna calecida defensa de las llibertades la canciller xermana pidíu que las consecuencias sofridas pol caricaturista “seyan una alvertencia pa tous nós”.
Westergaard vive baxu proteición policial dende que’l sou debuxu asoleyóu nu diariu danés Jyllands-Posten en 2005. Llíderes musulmanes aesgaya pidiorun que se caniara escontra los debuxos, lo que provocóu una fervienza internacional de manifestaciones acervantadas que costorun la vida a unas 150 presonas.

Alemaña allindará Facebook a los xefes

2010-09-25T15:39:00.004+02:00

Empobine sexual, creyencias políticas ou relixosas ya costumes d’un emplegáu son dalgunas cousas qu’una empresa puede esqueirare nuna rede social sobro los emplegaos de sou. Tamién los xefes de presonal lu fain pa sabere’l xacer d’un aspirante a un puestu de trabayu. El gobiernu xermanu nun yía gustante con aquestos vezos empresariales ya escamudóu la llei pa la proteición de datos.
Onque’l gobiernu defiende la midida cumo progresista en miente de proteición de datos, los xuristas alvierten que l’apricación de la yá ñomada “llei Facebook” será compricada porque yes-abulta defícil controlare ya comprobare que las empresas achisban a un emplegáu. Ensegún el menistru d’Interior Thomas de Maiziere, “un emplegador nun puede pidire amistanza nuna rede a un trabayador ou aspirante a un emplegu, ve-ye datos privaos ya usalos escontra él “.
La nueva llei será aprobada n’outubre ya asoléyase tres deillos escándalos venceyaos cola privacidá qu’afeutorun a cuñecidas empresas alemanas. La llei tamién entorgará outros vezos d’achisbar cumo l’usu de cámaras de vídiu nos centros de trabayu ou l’emplegu de detectives por parte de las corporaciones, qu’inxitan la nueva norma.

L’alzhéimer va barruntase enantias

2010-09-25T08:58:00.003+02:00

Eillo asocederá por mor de la esistencia d’una proteína, la betaamiloide, nu llíquidu cefalorraquídiu. Aquesta molécula ta venceyada al desenvolvimientu de la enfermedá, pero al asitiase nu celebru, nun habié manera de pescudala ensin causare mancadura.
Tamién se puede atopare l’alzhéimer con técnicas d’imaxe que ven los efeutos nu celebru, onque son caras ya compricadas de facere. Agora, centíficos norteamericanos forun a afallare la betaamiloide faciendo una punción llombar, lo que muestra l’estáu de la enfermedá de miente cenciella ya precoz.
Emilio Marmaneu, presidente de la Confederación Española d’Asociaciones de Familiares d’Alzhéimer (Ceafa), cunta que yá ta asumíu que la cura va a avagar ya que la torna de la enfermedá en crónica nun va sere ceu. Asina, el llabor de los centíficos pasa por adelantrare’l dianósticu pa que las melecinas s’alministren enantias.

Nueva melecina pa la hepatitis C

2010-08-17T22:26:00.004+02:00

El nuevu productu, qu’enanta del 50% d’anguañu al 70% la curación de la hepatitis C, ta na fas final de pruebas nos llaboratorios Vertex ya Merck Sharpe & Gohme. Mentanto, aquestos asperan el preste de las autoridades sanitarias d’EEXX, albedriáu pa fin d’añu. Asina, cúidase que teya n’España pa 2012.
La hepatitis C yía una enfermedá vírica que nun tien cura nin vacuna. El tratamientu usáu anguañu yía una remestura d’interferón ya ribavirina ya tien una tasa d’éxitu del 50% aproximadamente. Eillo tres un llongu procesu qu’avaga ente 48 ya 52 selmanas nu qu’apaecen baldadura ya murnia ente’l virus esfarrapia’l fígadu. Asina ya tou, el virus puede nun desapaecere, puxando que'l paciente amaleza de cáncer ou cirrosis.
Los resultaos atropaos cola nueva melecina merman el tratamientu a 30 selmanas ya amenorgan los efeutos secundarios. El productu arrebate l’aición d’una proteína, la proteasa, qu’intervién nu procesu d’infición de las células del fígadu pol virus.

Intel escamuda’l cobre pola febra

2010-07-30T02:31:00.003+02:00

El fabricante yá tien aniciáu, col encontu de la Nuversidá de California, una amestadura fotónica de seliciu ñomada Silicon Photonics Link, que yía a tresmitire datos a 50 Gbps. Eillo supón sostituyire lluz por ellectrones, nun avance qu’Intel cunta que yía “outru pasu alantre pa la sostitución d’aquestas amestaduras por una febras ópticas finas ya llixeras aesgaya, que pueden tresmitire más cantidá de datos a una distancia muchu mayor”.
El chip tresmisor afítase sobro cuatru láseres cuyos rayos de lluz viaxan a traviés d’un modulador ópticu que cifra los datos a 12,5 Gbps. Los cuatro rayos amécense lluegu ya envíanse a una única febra óptica p’alcanzare’l réxime de 50 Gbps. Al outru llau, el chip receztor cierne los cuatro rayos de lluz ya empobínalos a los fotodetectores que güelven a tornalos en siñales elléctricas.
Los investigadores d’Intel yá tán trabayando pa enantare la velocidá de los datos, por mor de la meyora de la velocidá del modulador, amás del incrementu del númaru de láseres por chip, lo qu’aportará un camín pa tenere enllaces ópticos de terabits nu futuru. Asina podráse tresmitire vídios en 3D d’alta resolución ou tenere comunicaos deillos centros de datos a más velocidá, anguañu acoutada pol cobre.

Intel Milestone Confirms Light Beams Can Replace Electronic Signals

Yá somos 500 millones d’europeyos

2010-07-29T03:58:00.004+02:00

La Xunión Europeya (XE) chegóu a 501,1 millones de presonas el 1 de xineiru de 2010 (1,4 millones más al respective de 2009), dalgo menos del cálculu feichu en 2009, qu’albedriaba 501,259 millones. L’aumentu de la pobración débese a la imigración, magar la crisis amenorgóu’l númaru de foriatos qu’ania dientro de las llindes de la XE. Asina, el 62,7 % de los nuevos habitantes vienen de fuera, con una tasa de medru en 2009 de 1,7 por cada mil, frente al 2,9 de 2008.
La natalidá tamién merma. En 2009 ñaciorun 5,3 millones de neños (10,7 por cada mil habitantes), frente a los 5,4 millones de nines que viniorun al mundu en 2008. Asina ya tou las cifras nun son bonas por mor del efeutu de la crisis, qu’arrebatíu’l medru demográficu. La pobración amenorgóu en siete estaos, ente eillos Alemaña con 203 habitantes menos, ente qu’outros 10 touviorun más muertes que ñacencias.
Aquestos datos avéranse a los aportaos nun informe de 2007 del Parlamentu Europeyu. Aquesti albedrióu qu’en 2050 la población de la XE tendrá avieyáu 10 años de media al tiempu que pasaremos a sere un 5% de la pobración mundial, cuando en 1950 yéramos el 15%.

Nokia Siemens enancha l’espectru

2010-07-21T19:55:00.002+02:00

Nokia Siemens Network, la sociedad amecida aniciada ente dambos fabricantes pa desenvolver las suas unidades de infraestructura de redes, anuncióu que va pagare 1200 millones de dólares pola mayor parte de la estaya de redes de Motorola. Ensegún encalcan los analistas, la operación permitirá a Nokia Siemens puxare’l sou desenvolvimientu nos mercaos d’Estaos Xuníos ya Xapón, asina cumo postiase frente a la competencia d’Ericsson AG ya d’outras empresas suministradoras d’infraestructuras inalámbricas qu’emburrian, cumo la china Huawei.
D’aquesta miente, Nokia Siemens inxerirá na sua faltriquera de clientes unos 50 operadores cumo China Mobile, Clearwire, KDDI, Sprint, Verizon Wireless ou Vodafone. Tamién-ye permitirá añedire a la plantilla los 7500 emplegaos de la estaya de redes de Motorola, ente eillos los de los centros d’investigación allugaos en EEXX, China ou India, d’eiquí a fin d’añu, pa cuando asperan que la transacción teya zarrada. Nu planu financieru, Nokia Siemens esfóutase en que la merca nun tenga impautu nas suas cuentas de 2010.

Los xuguetes repollecen outra ve

2010-07-14T17:10:00.002+02:00

Pa la cabeira selmana de santamarina ya tará nos cines la postrer estaya de Toy Story, quince años espués de qu’asoleyara la primer parte. Lee Unkrich, direutor de Monstruos S.A. ya Buscando a Nemo púsose al frente de la direición, un llugar que dexara John Lasseter (direutor de las outras duas partes) pa producire ya acomuñare col guión.
L’antañu neñu Andy ya yía un rapazón: tien decisiete años ya cola fin de dire a la nuversidá acuriosa la sua habitación dexando guardaos los xuguetes. Sicasí van acabare nuna guardería, nun entamu afalladiza pa quedare, na que ceu verán qu’hai qu’afuxire. Woody, Buzz Lightyear ya los ñeros de sou veránse arrodiaos de xabaces neños n’edá d’esfarrapie qu’esbabayan ya berran, ya cuñecerán a Ken (el querindangu de Barbie), al ouriciu tirolés Pricklepants ya al osu Lotso.

El film tien inxertaos los postreiros avances en 3D pa que la hestoria seya mas rial. “Usemos el 3D pa que’l púbricu pueda esfrutare de la esperiencia de la profundidá”, dixo Lee Unkrich de la película, que pañóu 109 millones de dólares na primer fin de selmana del estrenu nos Estaos Xuníos.

Rusia ya Polonia fain alcordanza de Katyn

2010-04-09T05:10:00.006+02:00

Ceminteriu de Katyn

Setenta años espués de la matancia de Katyn, la viesca del mesmu ñome, na redondada de la ciudá rusa de Smolensk, vivíu ayer una xeira hestórica. El primer menistru rusu, Vladimir Putin, amestóuse al sou ñeru polacu, Donald Tusk, nuna ceremonia de remembranza de los ventidous mil polacos asesinaos pola policiya secreta de Stalin, el NKVD, ente 1939 ya 1940.
Aquesti feichu foi siempres refugáu pol réxime soviéticu, que facié culpabre al exércitu nazi, ya forun aquestos quienes atoporun las fosas comunes en 1943, nu sou avance escontra l’este. Foi en 1990 cuando Mijail Gorbachov recuñecíu la responsabilidá de la XRSS ya vente años más sero, Putin, xunto al monumento dedicáu a las víctimas, dixo que “durante décadas, con camanduleiras mentiras, intentóuse ocultar la verdá sobro la matancia de Katyn”.
El llider rusu convidóu a “nun vivire nu pasáu” porque “nun se puede escamudare”, ya añedíu que se puede “afitare ya aveirare la verdá, ya aquesto sinifica xusticia hestórica”. Pola sua parte, el primer menistru polacu fizo un chamáu a la reconciliación afitada sobro la honestidá, mentando que “los güeyos de los que forun asesinaos eiquí por un disparu na tiesta amírannos güei ya asperan vere sé tamos aviaos pa tornare la mentira en reconciliación”.
La matancia de Katyn supuso la execución en masa, por orde direuta de Stalin, de ciudadanos polacos de magar 1940. Dende la sua prindada, durante la invasión de Polonia por parte de nazis ya soviéticos, tuvieran allindaos nos campos de concentración de Kozielsk (cerquina de Katyn), Starobielsk ya Ostashkov, ya en cárceles de Bielorrusia ya Ucrania.

La matancia de Katyn en Wikipedia

Pa xugare col cuerpu

2010-04-09T01:42:00.007+02:00

Microsoft quier enantare l’apuesta de Nintendo cola sua Wii col Project Natal, que cuando teya encesu, permitirá xugare con vidioxuegos ensin necesidá d’usare mandu dengunu. Namás hai qu’añedire un micrófono ya una cámara especial a una Xbox 360, pa qu’interprete la voz ya los movimientos del cuerpu del xugador hasta en 48 puntos estremaos.
Microsoft yá asoleyara dalgunos detalles del sou sistema na postrer feria E3, por sanxuán del añu pasáu, ya dende entoncias va faciendo presentaciones del mesmu por tol mundu. Natal compónse d’una cámara RGB (que recuñez los rostros), un sensor de profundidá, un micrófono multidireicional ya’l software de sou. Asina fai l’analís en 3D del aballare del cuerpu ya del sou empobine.
D’aquesti xeitu puédese baltare, xugare al balón ou afalare vehículos. Entovía nun hai datos del coste de Natal, onque s’espicula que teya asitiáu nos 80 euros aprosimadamente. Mentanto, Microsoft mienta qu'hai yá deillas compañías desenvolvmiendo xuegos p’aquesti nuevu sistema, que requier una distancia de más de dous metros ya mediu ente’l televisor ya’´xugador.

Esposición de Projet Natal na E3 de 2009

Asoleyada la buelga d'outru homínidu

2010-03-31T22:02:00.004+02:00

L'analís xenéticu d'un güesu de va 40000 años asoleya una escuñecida caterva d'homínidos, cerníos del "sapiens" ya'l "neandertal", que salíu d'África seique va menos d'un millón d'años ya anióu n'Asia Central. Espricóulu Svante Pääbo, el más prestixosu especialista n'ADN antiguu ya direutor del trabayu que pubrica Nature. Tamién mienta que nun se sabe rialmente cúmo yera la criatura, nin se cuñez polos restos afallaos enantias n'outros llugares.
Aquestas conclusiones derivan del analís xenéticu d'un cachu del deu pequeñu d'un neñu que vivíu ente 48.000 ya 30.000 años atrás en Siberia, nuna pequeña estaya na qu'acompangorun neandertales, sapiens ya los nuevos homínidos. El grupu de Pääbo emplegóu las mesmas técnicas usadas col analís d'ADN de neandertal, atopando asina las diferencias col ADN mitocondrial del sapiens ya'l neandertal que los chevorun a determinare que se trataba d'un linaxe estremáu.
"Los neandertales ya los homes modernos acerendórunse evolutivamente va mediu millón d'años, ya l'ancestru común de los trés data d'un millón d'años", siñala Pääbo, quien nun tien segurancia de que seya una nueva especie porque, onque "yera una nueva especie cuando remanóu n'África", lo analizáu "pudo sere fruto d'un crucie posterior durante'l que pañóu l'ADN mitocondrial".
El primer homínidu que salíu d'África foi l'Homo erectus, va unos 1,9 millones d'años, ya espués houbo al menos outras dúas salidas, la de los antepasaos del neandertal, va ente 500.000 ya 300.000 años, ya la del Homo sapiens va namás 50.000 años. Cumo namás se tien feichu l'analís xenéticu del neandertal, nun yía posibre la comparanza del supuestu nuevu homínidu colos anteriores.

Afalladas las moléculas qu’arrebaten el desenvolvimientu del sida

2010-02-26T04:12:00.002+01:00

Sábese bien que de tolas presonas que tienen la infición del VIH, una parte d’eillas nun desenvuelve la enfermedá del sida ya controlan el virus de miente natural, ensin necesidá de melecinas. N’España representan el 0,2 % de la población que tien el virus, ya los científicos chevan vente años esqueirando una espricación a apuestos casos, ñomaos “non progresores”.
Un grupu del hospital Clínicu de Barcelona, que cunta una de las causas nun estudiu asoleyáu na revista Plos One, viou que los pacientes tienen una gran capacidá p’aniciare unas moléculas chamadas alfa-defensinas, que remanan de miente natural de deillas células del organismu. Dalgunas d’aquestas células con las dendríticas, emportantes na defensa escontra axentes inficiosos.
Las defensinas son a arrebatere’l VIH ya fain que’l sistema inmunitariu seya más eficiente. “Furrulan cumo antibióticos naturales”, espricóu’l xefe del Serviciu d’Inficiosas del Clínicu, Josep Maria Gatell. Lo qu’afallóu el sou grupu yía que los seropositivos que nun necesitan tratamientu tienen una capacidá diez veces mayor d’aniciare aquestas moléculas que’l restu, siendo asina a entorgare l’espardimientu del sida.
Los investigadores del Clínicu mientan que “l’aniciu d’alfa-defensinas puede manipulase de miente cenciella”, ya que “de momentu, sabemos quei defiende al paciente del virus del sida ya aqueso será mui útil pa facere vacunas terapéuticas”. Tamién siñalorun que l’afaladura de las alfa-defensinas podrié evitare’l tratamiento a miles de presonas ya que serién valedeiras pa tratare outras enfermedades inficiosas.

Alcuerdu pa emburriare l’A400M

2010-02-25T05:54:00.004+01:00

Los siete estaos venceyaos nu programa del A400M (Alemaña, Francia, España, Reinu Xuníu, Turquía, Bélxica ya Luxemburgu) chegorun a un prencipiu d'alcuerdu cola empresa fabricante (Airbus Military, filial d'EADS), p'aveirare l'avión de tresporte melitar europeyu.
El programa, qu'escomencipióu en 2003 con un presupuestu de 20000 millones d'euros pa 180 aviones, tien anguañu unas pérdidas de 7600 millones, faciéndose cargu EADS de 3200 d'eillos. Pola sua parte, los estaos impricaos ponen sobro la mesa 1500 millones a mayores de los 2000 yá apautaos, asina que faltarién entovía 900 millones d'euros más.
Pero los territorios nun son gustantes con aportare más perras: "refugamos cualisquier renegociación sobro aspeutos económicos asina cumo nuevas propuestas de caráuter teunolóxicu", díxose dende'l menisteriu de defensa xermanu. Mentanto'l conseyeiru delegáu d'Airbus, Tom Enders, acenóu va poucu con arrebatere'l proyeutu, del que dependen 40000 emplegos.
L'alcuerdu puede asoleyase nu caleyu que los menistros de Defensa de la Xunión Europeya tán faciendo nas Isllas Baleares, ya cuincide alternachi cola ufierta que ficieran: aportare 2000 millones d'euros, apurrire un empréstamu por valor de 1500 con cargu a futuras esportaciones del avión a outros estaos ya adelantrare pagos pa que la compañía tenga liquidez enantias d'emprencipiare a aportare los aviones.

Motorola remana outra ve

2010-02-22T02:44:00.003+01:00

El conseyeiru delegáu de Motorola, Sanjay K. Jha, anuncióu nu Mobile World Congress el determín de la empresa por repollecela cola xeneralización de los smart-phones. Jha dixo que quier “chevare los teléfonos intelixentes al mercáu de masas”, tres cuñecese l’asoleyamientu de nuevos terminales cumo’l Mileston, la versión europeya del afamáu Droid, ya’l Quench, dambos afitaos sobro’l sistema operativu de Google.
Ya yía que Motorola pondrá nu mercáu hasta vente nuevos terminales que cuntarán col Motoblur inxeríu, un serviciu qu’añede na pantalla prencipal del móvil tola actividá online. Outros fabricantes, cumo Samsung ya Microsoft, col sou sistema Windows Phone 7, tamién siguen aquesta buelga.
Mentanto, la compañía cheva yá vendíos más de dous millones d’unidades de los sous nuevos táctiles: Droid ya Cliq. A nivel mundial, Motorola esfrutóu namás del 4,6 % de cuota en teléfonos intelixentes nu cabeiru trimestre de 2009, por detrás de Nokia, RIM ya Apple. Asina ya tou, el conseyeiru delegáu de la compañía norteamericana diz nun tare tan priocupáu pola cuota de mercáu cumo por ufrecere terminales ya servicios estremaos.
Alitada la compañía, Sanjay tien agora dous llabores más por delantre: tornare a los beneficios en fin d’añu ya esgayare Motorola en duas estayas. Una d’eillas tendrá la unidá de móviles ya de televisiones ya la outra trabayará en desenguedeyos d’empresa ya redes.

Roma allabancia l’auténticu Caravaggio

2010-02-21T01:33:00.004+01:00

Una esposición única, a los 400 años de la muerte del artista, regune namás las venticuatro prencipales oubras sobro cuya autoría nun hai dulda denguna. El verdadeiru Caravaggio escóndese ente las sulombras de las suas pinturas, yá que los espertos entovía alderican cuantas de las cien oubras que se-ye atribuyen son verdadeiramente suyas.
Michelangelo Merisi, trasgu, xenial, bardín ya abarrenáu, murríu va agora cuatrocientos años nuna playa de Porto Ercole, u desembarcóu yá amalecíu, tres cuatro años afuxendo d’una cundena a muerte del Papa por asesinatu. Roma, la sua ciudá, cellébralo con una esposición prestosa qu’escorreixa amenorgare a lo fondeiru el sou llabor, reguniendo aqueillas oubras que son craramente suyas.
Saliorun venticuatro. Nun son todas pero si las cimeiras de la mitá que tán esparramadas por museyos de tol mundu. El restu nun s’aballan ya hai que dire a velas a igresias ou palacios, poro, la esposición de las Scuderie del Quirinale asoleya los frescos que tien espardíos pola ciudá. Por mor del cabudañu de la sua muerte los itinerarios ‘caravaggiegos’ de Roma enriquécense con requeixos añubríos, cumo l’óleu sobro paré del Casino Ludovisi, enxamás ensiñáu al púbricu ya que mui poucos tienen vistu.

El celebru fala n’estáu vexetativu

2010-02-06T02:12:00.002+01:00

La nuevas técnicas de resonancia manética son a acolumbrare quei arias del celebru s’activan en determinaos estímulos. La llinde ente la coscencia ya la incoscencia nun yía fácil d’afitare, pero los espertos cernen cuatro situaciones: nos estremos asítianse’l coma ya la plena coscencia ya nu mediu queda l’estáu vexetativu ya’l de mínima coscencia.
Naquestas postreiras situaciones yía onde son valedeiras las investigaciones feichas. En 2005 ya 2006 amosóuse qu’en dalgunos pacientes n’estáu vexetativu habié actividá mental, ya en 2007 un estudiu con siete presonas asoleyóu que na mitá d’eillas se-yes activavan las arias del celebru correspondientes al llenguaxe cuando se-yes falaba.
Agora, un trabayu pubricáu por New England Journal of Medicine cunta la investigación na que cinco presonas, de las 54 d’un ensayu rializáu polas nuversidades de Cambrige ya Lieja, respondién a dalgunos estímulos. Miéntase tamién nu artículu a un home qu’en 2003 quedóu n’estáu vexetativu tres sofrere un accidente de tráficu, ya en cuyo celebru s’activaban las arias del llenguaxe venceyadas a l’afirmación ya la negación al face-ye entrugas cenciellas.

Italia anicia’l premisu de residencia por puntos

2010-02-06T01:38:00.001+01:00

Los menistros d’interior ya trabayu del estáu trensalpinu tienen yá encesu’l farragachu xurídicu pa “evaluare ya garantizare” l’inxerimientu de los inmigrantes. Yía un premisu de residencia qu’obrigará a los foriatos a pasare deillas pruebas ya esámenes p’allugase llegalmente n’Italia, cumo la cuñecencia de llingua, costitución ya reglas cívicas italianas, l’envíu de los neños a la escuela ya tenere tolos impuestos pagos.
Se cumpren aquestos requisitos tendrán el premisu de residencia ya “trenta puntos” cumo ciudadanu italianu, senón, tendrán un añu pa conseguilos. En casu contrariu serán espulsaos d’Italia. Las infracciones del Código Penal italianu supondrán la merma de puntos, nun estáu cuyo gobiernu tien deillas presonas con antecedentes penales ya procesos abiertos.
La oposición ya las asociaciones d’inmigrantes reaccionorun con refugu ya xirigoncias a l’anuncia. El deputáu del Partíu Demócrata, Gian Claudio Bressa, dio la ñorabona al gobiernu ya que “sere inmigrante n’Italia yía una llotería social”. Mentanto, las asociaciones d’inmigrantes siñalorun que nun se puede pidire a los foriatos qu’adeprendan una costitución qu’el mesmu presidente del gobiernu inxita con frecuencia.

“Financial Times” esmolecíu con España

2010-02-05T02:16:00.006+01:00

Ensegún el diariu económicu España sigue la buelga de Grecia por mor del nivel de deuda ya’l déficit presupuestariu de suyu. Naquesa llinia cuida que los estaos del sur d’Europa forun dexando pa desoutrodie lo que tenién que tenere feichu va años. Nuna columna asoleyada aquesta selmana ya entitulada Spain´s economy encálcase que’l nivel de deuda qu’albedria l’executivu español pa 2012 yía del 74% del PIB, el doble de la qu’habié enantias del entamu de la crisis. Aquesta cifra queda llonxe del 115% qu’anguañu tien Grecia, pero “con una economiya cuatro veces más grande que la griega, cualesquier torga puede tenere mayores consecuencias".
N’outru artículu pubricáu, Financial Times considera que yía “malu abondu que los inversores nun tengan esfoutu na política económica de Grecia” polo que yía emportante por demás que l’estáu español acuriose las suas cuentas pa que la eurozona nun se resienta. A mayores, remembra’l prestixosu diariu qu’España yía l’únicu gran estáu desenrolláu que nun aspera medrare yá que’l sou PIB entovía va mermare un 0,6% en 2010.
A lo cabeiru'l rotativu cuida que tou aquesto nun serié pa priocupase se’l gobiernu de José Luís Rodríguez Zapatero “touviera adeprendíu dalgo de la sua crisis fiscal”. Poro considera que dende l’entamu de la crisis, va dous años, fasta güei, l’executivu español gastóu albentistate, amás de sere optimista abondu colas cifras que xinglaban dende’l sou departamentu d’Economiya. Eillo fai que seya defícil asgaya convencere a los ciudadanos pa que faigan sacrificios.

Cataluña quier escamudare’l sou mapa

2010-02-04T02:11:00.004+01:00

El Conseyu Executivu de la Xeneralidá diou ayer el preste al aniciu de la Llei de Vegueriyas, qu’arreya una nueva organización territorial ya alministrativa de Cataluña ya que supón la eliminación de las cuatro deputaciones provinciales, las cuales apurrirán el sou llabor a los siete Conseyos de Vegueriya. Aquesta yía una vieya aspiración d’ERC, que redactóu la llei, tamién inxertada nu programa de gobiernu que’´PSC presentóu nas postreiras ellecciones, onque nu partíu social-demócrata nun paecen mui antusiasmaos cola ideya.
El nuevu mapa catalán albredria aprosimadamente, dixebrare en duas estayas las provincias d’anguañu de Barcelona (Cataluña Central ya Barcelona), Llérida (Llérida ya Altu Pirinéu-Arán) ya Tarragona (Tierras del Ebru ya Campu de Tarragona), de miente que cola vegueriya de Xerona afitarién los siete territorios. Tres la exposición de las llinias xenerales a dalgunas autoridades por parte del presidente del gobiernu autonómicu, remanorun las roceas.
La propuesta de llei nun acraria quei poblaciones van sere las capitales de cadaguna de las nuevas demarcaciones, poro, habrá desputas ente dalgunas ciudades por sere’l centru d’eillas. El mayor enoyu vieno del alcalde de lleridanu, Ángel Ros (PSC), que refuga la francedura de la sua provincia ya l’inxerimentu del Solsonés, anguaño en Llérida, en Cataluña Central. Pola sua parte, el Valle d’Arán nun tien esfoutu en que la nueva normativa vaiga aveirare la sua identidá, ente que l’alcalde de Tarragona (Josep Fèlix Ballesteros, CiU) nun yía gustante con que Tarragona cheve delantre “Camp”. Mentanto, la llei tranca las puertas a que Penedés ya Altu Ter seyan vegueriyas.
Las vegueriyas tienen el sou aniciu nu sieglu XII ya avagorun fasta’l XVIII, cuando forun escamudadas por correximientos, cumo siñalaba’l Decretu de Nueva Planta promulgáu por Felipe V tres la Griesca de Socesión. El conseyeiru de Gobernación ya Alministraciones Públicas, Jordi Ausàs (ERC) dixo que’l cambiu nun va sere traumáticu: las deputaciones serán tornadas en cuatro vegueriyas, de las darréu s’esgayarán los trés territorios restantes.

Samsung ya yía la más grande del sector

2010-02-01T01:43:00.003+01:00

El grupu surcoreanu Samsung Electronics diou anuncia la selmana pasada de que en 2009 el sou beneficiu netu enantóu nun 75 % ya las suas ventas chegorun a los 87470 millones d’euros, tornándose asina na mayor compañía de tecnoloxía del mundu. El que yía’l primer fabricante de pantallas planas ya chips, ya segundu en terminales de telefonía móvil, superóu asina en facturación a Hewwlett-Packard ya a Siemens.
Magar los probes resultaos que touvo nu cabeiru trimestre de 2008 ya la situación económica mundial, los beneficios de Samsung disparórunse por mor de la xubida de precios nos prencipales productos ya pol aumentu na demanda de televisores. Tamién axudóu’l puxu de la compañía nas economías emerxentes ya la sonce moneda llariega, el won.
Nu mercáu de la telefonía móvil las cuentas de Samsung estremórunse abondu de los de Nokia ou Motorola, quienes viorun mermaos los beneficios nu postreiru añu. Pola sua parte, la estaya de chips doblóu las ganancias sofitada pol aumentu na venta d’ordenadores presonales que supuso Windows 7.
La compañía d’ellectrónica albedria que’l sou balumbu naquestas áreas de mercáu va mantenese en 2010. Anguaño, cuatro de cada diez teléfonos vendíos nu mundu son de Samsung, ente que na bayurosa estaya de las pantallas LCD yá supera a los sous compitidores xaponeses. L’aniciu de chips aspera siguire medrando cola chegada del iPad d’Apple, del que yía el sou proveedor.

Avérase l’USB 3.0

2010-01-31T03:48:00.004+01:00

La nueva xeneración del universal serial bus va mantenere’l cableáu de cobre pa que seya compatible colas tecnoloxías d’enantias, onque enverde usare cuatro llinias, cumo nu USB 2.0, va tenere cinco. Eillo pa sere diez veces más rápidu que’l sou antecesor.
El presidente del Filandón d’Apricaciones USB presentóu’l chamáu Super Speed USB na feria CES de Las Vegas. L’aumentu de velocidá amosóulo pasando un archivu de 2,1 GB d’un portátil a un disco esternu. L’USB 3.0, amás, yía más eficiente nu consumu enerxéticu, qu’amenorga nun terciu.
Yá hai deillos fabricantes impricaos na sua instalación: Western Digital ou Seagate, por exemplu, anunciorun discos esternos equipaos con USB 3.0. Pola sua parte, Asus, Fujitsu ya HP tienen modelos de portátiles furrulando col nuevu USB.

Moscú ya Minsk andan en polichos pol crudu

2010-01-03T21:43:00.003+01:00

Rusia trancóu'l suministru de petróleu el pasáu 1 de xineiru a las refinerías del sou vecín Bielorrusia. Eillo asocede por mor del desalcuerdu que dambos estaos tienen al respective de los precios que deben fincase l'añu que vien. Ensegún deillas compañías enerxéticas rusas, informa'l diariu El País, la midida de presión rusa nun supón torga denguna pa que'l crudu siga chegando a Europa central.
Las mesmas fontes siñalan que Bielorrusia acenóu con enantare los precios de tránsitu de petróleu al restu d'Europa fasta diez veces más del preciu fixáu nun entamu. D'aquesta miente respondíu Minsk al determín rusu de face-yes pagare tolos impuestos d'esportación a las refinerías bielorrusas.
Magar la falta de suministru, duas de las cimeiras refinerías de Bielorrusia tienen materia prima abondo pa una selmana más. Aquesti desalcuerdu remembra al que dambos estaos mantuvioron nu entamu de 2007, que, onque causóu dalgunos problemas a Alemaña, nun foi tan terriu como los conflictos que mantuvieran Rusia ya Ucrania.

El PNV yá nun quier a Aralar nu Gobiernu alavés

2009-11-28T00:39:00.003+01:00

Sede de la Deputación Foral d'Álava (Vitoria)

El deputáu xeneral d’Álava, el demócrata-cristianu Xabier Agirre, destituyóu al únicu miembru del sou gabinete perteneciente a Aralar, el cabezaleiru de Mocedá ya Aniciu Social, Xabier Aspuru. Aquesti abstúvose na votación de los presupuestos ensin aportare razón denguna pa la sua decisión. Agirre pidíu-ye que demitiera, a lo qu’Aspuru se negóu, polo que foi destituyíu del sou cargu nu intre.
La decisión d’Aralar d’abstenese nos presupuestos forales tomóuse d’un die pa outro, foi adoztada pola direición del partíu ya yera escuñecida pol PNV. Aquestos cuidan que la decisión ta venceyada col pautu alcordáu ente PNV ya PSE-EE pa sacare alantre los presupuestos nas deputaciones forales.
Pola sua parte’l vicecoordinador xeneral d’Aralar, Jon Abril, acusóu al PNV de “deslealtá absoluta” hacia la sua formación, ya espricóu que tres el pautu ente PNV ya PSE-EE los demócrata-cristianos nun cuntoron con Aralar p’aniciare unos presupuestos que-yes abultan curtios ya pouco progresistas na tema fiscal.

Apecháu’l II Seminariu Internacional sobro Antisemitismu

2009-11-23T02:41:00.003+01:00

Sinagoga de Córdoba, aniciada nu sieglu XIV

Ún de los prencipales desenguedeyos puesto enriba la mesa tres duas xeiras, foi que’l feichu d’inxitare al pueblu hebréu vien “del perxuiciu ya la descuñecencia de la cultura xudiga”. Asina rematóu’l Seminariu cellebráu en Madrí, que barrunta al tiempu un sonce aumentu del refugu a los fiyos d’Israel.
L’alderique, amás de vieyu, yía compricáu, ya esixe bien de precisión: “hay que dexare espaciu a una crítica al Gobiernu d’Israel ensin trespasare la llinia roxa”, mentóu Ana Salomón, embaxadora en misión especial pa las Rellaciones cola Comunidá ya Organizaciones xudigas. D’igualmiente Alejandro Baer, profesor na Nuversidá Complutense de Madrí, cuida que “yía fundamental cernire ente la crítica política ya la información antisemita”.
El caleyu sirvíu tamién p’aniciare’l primer Observatorio d’Antisemitismu d’España, allabanciáu pol presidente del Movimiento escontra la Intolerancia, Esteban Ibarra. La estitución será la canal qu’asoleyará los actos de refugu a los xudigos, ya ñaz col obxetu d’espertare la concencia social en cuantas a los eventos de carácter antisemita n’España. Afita tamién una ponte más pa la llucha escontra la intolerancia de cualesquier tipu.

Telefónica va postiase n’Alemaña

2009-11-23T00:56:00.002+01:00

Sede de Telefónica, na Gran Vía de Madrí

La compañía, que ya taba asitiada nu mercáu móvil de la federación centro-europeya a traviés d’O2, baltará tamién eillí nu del accesu a la rede por ADSL. Eillo foi tres mercare Hansenet, la cuarta operadora de banda ancha alemana, a Telecom Italia.
Hansenet va costa-ye a Telefónica nuevecientos millones d’euros tres un alcuerdu cola compañía italiana, na que la operadora presidida por César Alierta tien una partecipación del 7%, qu’avagóu más d’un añu en robrase. Al tiempu quedará añubrida la deuda de Hansenet, fincada en 659 millones d’euros, ya que taba cobierta por empréstamos de Telecom Italia.
Telefónica sumará asina 2,2 millones de clientes de banda ancha a los quince que-ye aporta O2 ya inxerirá los 2300 emplegaos de Hansenet, qu’ufrez banda ancha fixa ya móvil baxo la marca Alice. Por mor del altu grau de recuñecencia d’aquesta, Telefónica va mantenela enceso nos dous años vinientes, onque escurque la inxerte darréu n’O2.

Los intelectuales yá nun son gustantes con Zapatero

2009-11-21T22:04:00.003+01:00

Círculu de Bellas Artes, cai Alcalá (Madrí)

Intelectuales dalgunos, namás artistas outros, el casu foi que’l mundu de la cultura arimáu a la esquierda s’axuntóu nu Círculo de Bellas Artes de Madrí p’asoleyare un manifiestu que quier aguyare al gobiernu del PSOE pa qu’escamude la política que desenvuelve porque nun-yes gusta un nadín.
Taban deillos de los que nas outras campañas electorales sofitoron a Zapatero con antusiasmu, como Miguel Ríos, quien ensin mal aquel dixo que “güei nun-ye votarié”, ya los que enxamás tuvioron al llau del presidente del gobiernu. Toos eillos esíxen-ye políticas “progresistas”, sobro tou pa facere frente a la crisis, cuidando entoncias, que las que se desenrollan anguaño nun lo son.

El testu, nu que fegura’l pegollu de Sabina, Serrat, Vitor Manuel, Aute, Pilar Bardem, Juan Diego Botto, Juan José Millás ou Almudena Grandes, ya entituláu “Outra política ya outros valores pa salire de la crisis”, vindica, ente outras cousas, “reformas fiscales que garanticen la equidá, la facendera fiscal, ensin paraísos nin previlexos pa millonarios”.

Mickey acompangará con Spiderman

2009-09-26T12:48:00.001+02:00

Escurque’l sou xeitu teya allonxáu por demás, pero n’economía tou yía posible. Asina, Disney mercóu Marvel, l’abellugu de superhéroes como Spiderman ou los X-Men, por unos 4.000 millones de dólares. Nun s’acolumbra cambiu dengunu nel xacer de Marvel con aquesta operación, que de momentu namás se centrará nas posibilidades mercadotécnicas de los presonaxes de la compañía resultante.
Desoutrodié de l’anuncia, que pasmóu a propios ya estraños, Disney zarróu la xeira bursátil con una cayida del 2,98%, fasta 26,4 dólares por acción, ente que Marvel enantóu un 25,15%, fasta 48,37 dólares. Los accionistas de Marvel recibirán 30 dólares polos sous títulos ya l´equivalente a 0,745 acciones de Disney, colo que s´enanta´l valor de la compañía a 50 dólares por acción.
Marvel amortalecié fasta que foi a alendare por mor del exitosu trespasu de los sous presonaxes al cine. Los bonos resultaos de las suas películas tornoron a la editorial nun emporiu, rentable por demás, un pequeñu tesouru pa un grande como Disney. Eillo entorgará, a mayores, los llabores de producción ya destribución que Marvel robrara con Sony, Warner, Paramount ya 20th Century Fox.

El Corte Inglés fai frente a la crisis

2009-09-20T20:24:00.004+02:00

Centro de El Corte Inglés de Gaia (Porto)

Los resultaos de la cadena son cuasi tan valedeiros como’l PIB, la EPA ou l’IPC pa cuñecere l’estáu de la economía n’España. El grupu comercial amenorgóu a la mitá los beneficios en 2008, ya vióuse afaláu a rebaxare precios ya marxes ya a enantare la financiación de los sous clientes pa mantenere las ventas. Asina ya tou, esguilóu na crasificación mundial fasta’l segundu llugar, quedando namás por detrás de la cadena estaoxunidense Sears.

El Corte Inglés decidíu mantenere’l sou plan d’inversiones, l’apertura de nuevos centros ya la plantilla, que cuasi chega a los 100.000 emplegaos, onque de la crisis nun se salvara denguna de las estayas de negociu. La matriz baxóu un 18%, ente qu’Hipercor mermóu las suas ganancias nun 24,8% ya la devisión financiera nun 55,3%. Los supermercaos Supercor ya Opencor, la cadena de roupa Sfera ya las tiendas de bricolaxe Bricor, pola sua parte, touvioron pérdidas.

El presidente del grupu, Isidoro Álvarez, cuntóu que, magar las "grandes deficultades del mercáu", la compañía siguirá la sua política creciente d’inversiones, estaya a la qu’en 2008 empobinóu 1.827 millones d’euros, la mayor cifra de la sua hestoria. Enantias de fin d’añu abriránse los nuevos centros de Salamanca, Eibar ya Murcia, ya continuará l’aniciu de los de Tarragona, L’Exíu ya Córdoba.

Marchóu Edward Kennedy

2009-08-28T02:55:00.003+02:00

Ted Kennedy, el “llión lliberal del Senáu” (atolénese lliberal n´EEXX como progresista), ún de los políticos más influyentes na hestoria de la federación ya miembru de la familia con más xeitu de norteamérica, finóu de cáncer a los 77 años nu sou fogar de Massachusetts.
Mesmamente Obama, quien touvo´l sou encontu na buelga a la presidencia, cuida que “el nuesu país perdíu un gran llider, l´home que coyíu´l llumeiru de los sos harmanos cayíos ya que chegóu a convertise nu senador más grande del nuesu tiempu”.
Edward Kennedy, que d´igualmiente que los sous harmanos John ya Robert s´empobinóu p´hacia la Casa Blanca, decidíu que´l sou llabor “nun yía chegar a la presidencia sinon el serviciu públicu”. Más entovía tres l´accidente del coche qu´afalaba, que cayóu nu augua ya nu que murríu afogada la sua acompañante, seique la sua querindanga.
Magar el sou enclín esquerdiegu yera respetáu por demás pol grupu republicanu. Foi a espurrire la cobertura sanitaria a los neños, emburrióu la financiación pa la investigación sobro´l SIDA ya puxóu, fasta´l sou cabeiru fuelgu, pola sanidá pública nuversal, que encamentóu a Richard Nixon ou a Bill Clinton.

Afallada una fosa con represaliaos de la Griesca Cevil

2009-08-21T21:02:00.005+02:00

L´Asociación pa la Recuperación de la Memoria Hestórica desenterróu, col arimu d´axentes de la Guardia Cevil, las cadarmas de cuatro homes aperrillaos escurque por pistoleiros falanxistas n´avientu de 1936. Los finaos yeran de la montaña oriental llionesa, onque foron afalaos a Quintana de Rueda nun camión pa executalos.
L´equipu d´arqueólogos ya antropólogos forenses de l´ARMH atopóu los refugos de cuatro cuerpos cola tiesta esfuracada por impactu de bala, a mayores de los proyectiles. Trés de las víctimas yeran solteiros ya trabayaban nu campu, ente que´l cuartu yera zapateiru en Santa Olaya d´Aición. Xustamente sou fiyu Pulpinu González siguíu´l llabor d´exhumación.
“Matóronlu a los 34 años, you tenié entoncias cinco” dixo Pulpinu, quien lu remembra xubíu na sua becicleta. “Un home cuntóume que sou pá, que trabayaba cerca, viou las lluces del camión ya ouyóu los tiros”, mienta Pulpinu ente se decata qu´ente los restos de sou pá hai unos ximielgos ya un chisqueiru, onque nin buelga del relox que chevaba cuando lu matoron.

Anuncia nu Diario de León

Asociación pa la Recuperación de la Memoria Hestórica

Nuevu sistema de control de velocidá

2009-08-20T21:57:00.004+02:00

Túnel de l´A6 na cordal del Guadarrama (Castiella)

Yía´l la postrer ferramienta que la DGT va utilizare p´allindare la velocidá másima de los vehículos ya que n´outoñu escomenciará en pruebas nu tercer túnel del Guadarrama. Trátase d´un sistema de control de velocidá media por estayas aniciáu por Indra, que yía a vexilare estayas de fasta vente kilómetros ya que servirá pa xinglare a aqueillos que namás merman la velocidá al pasare por delantre d´un radar.
Engarabitadas sobro cada carril de la vía, al entamu ya a la fin de la estaya controlada, pingan duas cámaras que furrulan por infrarroxos ya lleen las matrículas de los vehículos. Un servidor encárgase de ponere en cobru las imaxes cola houra na que foron tomadas ya facere la comparanza de los datos de dambas cámaras, que tán sincronizadas vía satélite pa que nun haiga esfás.
L´apricación informática albedria la velocidá media a la que se rodóu, ya en casu d´infracción envía los datos procesaos pa que los reciba´l centru de tramitación de denuncias de Llión ciudá. El primer estáu europeyu en vexilare´l tráficu d´aquesta miente foi Holanda, al que siguioron Reinu Xuníu ya Austria.

Microsoft quier xama-ye´l pastel a Google

2009-08-18T21:24:00.002+02:00

La griesca na rede ente Microsoft ya Google avaga yá once años, ya los primeiros acaban d´amecese con outro vieyu cuñecíu de la rede, Yahoo!, cuyu buscador yera´l más usáu fasta que Google aprucíu n´escena. Dende entoncias nun fizo outra cousa que ganare mercáu, que s´aballa ente´l 60 % n´EEXX ya´l 90 n´Europa.
Microsoft, que yía la dueña de Hotmail ya Messenger, llanzóu´l sou primer buscador en 1998, MSN Search, ya dalgunos años espués chamóulu Windows Live Search. En 2007 golvíu a escamuda-ye´l ñome, Live Search. El 3 de san xuan d´aquesti añu asoleyóu Bing, un ñome fácil de prenunciare que tien un sinificáu asemeyáu a “¡eureka!”.
La teunoloxía de Bing ta afitada sobro Power Set, un motor de búsqueda semánticu, qu´axuda a atopare meyor la información que s´esqueira. L´alcuerdu ente Microsoft ya Yahoo! supón qu´aquesti chevará inxeríu´l motor de Bing, ente que Yahoo! xestionará la publicidá del nuevu buscador.

Nin A4 nin A5

2009-08-10T19:09:00.005+02:00

La ideya foi de Mercedes, que l´anicióu col CLS. Darréu Volkswagen siguíula col Passat CC. Pola sua parte Porsche vien de facere una berlina con un coupè. Agora Audi sigue la buelga col A5 Sportback, con unos precios qu´esco-menciarán, de magar la fin de setiembre, cuando yá teya nu mercáu, nos 35220 euros de la versión más básica.
L´A5 Sportback yía un A5 con cuatro puertas ou un A4 de cinco, nun da más. Yía igual de llongu que l´A4 (4,71 m, 9 cm más que l´A5) ya 3,6 cm más baxo qu´él. La parte delantreira yía igualita que la del A5 ya tien el teichu combáu: cai por detrás ya amécese con una curtia zaga, onde s´alcuentra el portón qu´aveira un maleteiru de 480 litros de capacidá. Tien el mesmu interior que´l sou harmanu de trés puertas, col asientu d´atrás dixebráu en duas plazas.
En cuantas a la mecánica, el Sportback tendrá los mesmos motores que´l A5 convencional. Dende l´entamu tarán a la venta´l 2.0 TDi (170 CV), el 2.0 TFSi – 180 CV, el 2.7 V6 TDi (190 CV), el 2.0 TFSi - 211 CV, el 3.0 V6 TDi (240 CV) ya´l 3.2 V6 (265 CV). Esceptu los trés primeiros, los demás cuntan con tracción total Quattro ya caxa de cambios S-Tronic de siete velocidades. Las versiones con tresmisión manual tienen inxeríu´l sistema Start&Stop, qu´arrebate´l motor nos atascos ya atropa la enerxía gastada al frenare.

Site d´Audi

Afállase´l mapa más antiguu d´Europa occidental

2009-08-05T22:41:00.004+02:00

Investigadores de la Nuversidá de Zaragoza atoporon na cavierna d´Abauntz, en Navarra, unos grabaos nunas piedras de va más de trece mil años que resultoron sere un mapa de la fasteira. Neillos descríbese´l paisaxe del llugar, con cuetos, rieos ya llagos. La investigacion, qu´avagóu quince años, asoleya na revista dexital Journal of Human Evolution ya foi derixida pola cadralga de Prehestoria de la nuversidá aragonesa, Pilar Utrilla.
Utrilla escomencióu a esfuracare en 1976 na cueva navarra afalada pol fináu antropólogu vascu José Miguel de Barandirán. El sou grupu atopóu nos noventa dous bloques de piedra de material calizu ya blandiu por fuera, lo que tendrié facilitáu la sua grabación. Un d´eillos amuesa animales debuxaos ya l´outru yía´l que representa con bien d´esactitú´l paisaxe de la contorna de la cueva d´Abauntz.
Na piedra apaez grabáu´l cuetu de San Grigoriu, asitiáu frente a la cavierna, asina como´l rieu, los sous afluentes ya´l chanu, nu qu´estremaos círculos quiciá representaban fasteiras con augua enllamorgada n´eviernu. Ensegún Utrilla, escurque los habitantes d´aquesa zona antaño dexaban bloques grabaos en cuevas pa remembrare ónde taban asitiaos los llugares.

El VIH en chimpancés yía a matalos

2009-07-26T21:00:00.004+02:00

Fasta va pouco cuidábase que´l SIV, el virus d´inmunodeficencia en simios que yía´l precursor del VIH de los humanos, nun mancaba un nadín a los chimpancés. Abultaba que la infición que-yes provocaba yera asintomática ya nun-yes causaba enfermedá.
El grupu llideráu por Beatrice H. Hahn estudióu a cuasi cien chimpancés de la contorna del llagu Tanganica, ya tres nueve años de llabor decatóuse de que´l SIV yía igual de dañible naquestos simios que´l VIH nos humanos. "Los chimpancés son semeyaos por demás a los humanos xenéticamente, conque nun deberié pasmare´l feichu de qu´aquestos virus tan venceyaos provoquen la mesma enfermedá en dambas especies", dixo Hahn. Nos analisis ficióronse necropsias a los chimpancés muertos que resultoron nidias: "La primer ve que vi aquestas muestras quedéi pasma, [...] amosaban un desaniciu estremu de texíu linfáticu ya abultaban iguales a las d´un paciente humanu fináu por sida", mentóu la patóloga Karen Terio.
Los resultaos del trabayu foron asoleyaos por Nature, ya espeyan que la infición col SIV ta arreyada cola merma progresiva de las CD4 T, las células diana del SIV, ya con síntomas d´inmunodeficencia semeyaos los que produz la infición con VIH.

Isllandia quier inxerise na XE

2009-07-18T20:18:00.004+02:00

Vivienda llariega d´Isllandia

El Parlamentu isllandés encamentóu al gobiernu escomenciare las negociaciones pa la sua inxertadura na Xunión Europeya. El ñomáu Althing, la cámara llexislativa del país nórdicu, diou´l preste por 33 votos favoratibles frente a 28 a la escontra, a una moción presentada pol Gobiernu nu qu´acomuñan el Partíu Socialdemócrata ya´l Movimientu d´Esquierda Verde.
La primer menistra, la socialdemócrata Jóhanna Sigurdardóttir, cuida que l´ingresu na XE va sere una de las claves pal aniciu económicu d´aquesti país de 320000 habitantes, xabazmente cutiáu pola crisis financiera mundial. El Gobierno tien l´encrín de presentare la solicitú nu caleyu de menistros de Mientes Esteriores comunitarios del prósimu die 27. Si l´alcuerdu sal p´alantre, los isllandeses deberán sere gustantes mediante referéndum.

California anda albentistate

2009-07-17T19:09:00.003+02:00

Senáu de California, Sacramento

Con un déficit que medra en 40 millones de dólares cada die, la outava economía mundial ta cerquina d´estoupare por mor de la crisis. “Gastamos más de lo que tenemos”, dixo´l sou gobernador Arnold Schwarzenegger l´unu de santa marina, cuando´l Senáu californianu refugóu´l presupuestu que propusiera´l que foi actor. Asina querié mermare´l balumbu del furacón de 18861 millones d´euros que tien l´estáu.
La tasa apricada a las plusvalías ya la que grava´l consumu son las duas prencipales fontes de pañadura d´ingresos de California. La primeira amenorgóu nun 34% col sapazu bursátil. L´IVA tamién s´abatíu col torniscazu del consumu, tan afectáu como en cualisquier outra economía d´occidente. Schwarzenegger cuidaba encurtiare los gastos mermando los servicios educativos ya sanitarios, dalgo qu´entorgóu la mayoría demócrata na cámara californiana, que, sicasí, yera gustante cola ideya de xubire impuestos a las petroleras ya a las rentas más altas.
Ensin presupuestu aprobáu, el gobernador aforra en nóminas, arrebate contratos ou atrasia devoluciones d´impuestos. Asina ya tou nun yía abondo. Poro, l´estáu californianu escomencióu a emitire los IOU (sieglas n´ingrés de “you débote”), colos que paga a los sous proveedores. Los pagarés de la emisión de deuda, que nun entamu va sere de 3000 millones de dólares, pueden sere vendíos a terceiros ya tórnanse con intereses. D´aquesta miente son la moneda cola qu´anguaño l´estáu californianu paga los servicios que-ye emprestan.

PSOE ya PP siguen atrasiando l´autovía del Sil

2009-07-10T13:56:00.007+02:00

Una representación de la Plataforma de Defensa de l´Autovía Turenu – Vil.lablinu, que regune a los untamientos de Turenu, Páramu ya Palacios de Ribas del Sil ya Vil.lablinu, aconceyoron col secretariu d´estáu de carreteras, Victor Morlán, pa face-ye´l pidimentu d´inxertare aquesta oubra nu Plan Estratéxicu d´Infraestructuras ya Tresporte (PEIT), d´u la sacóu José Luis Rodríguez Zapatero p´aforrare gastos nos Presupuestos Xenerales del Estáu.
La hestoria d´aquesta infraestructura yía llonga por demás, d´igualmente que la folganza de los dous prencipales partíos pa, nun entamu escomenciala, ya agora pa rematala. L´actividá minera ya d´aniciu de llectricidá nas fasteiras qu´atraviesa la C-631 (Ponferrada – La Espina), fai que siempres touviera tráfico aesgaya. Amás, l´amecedura ente Ponferrada ya Uviéu yía una vía de comunicación estratéxica, tanto pa las comarcas d´El Bierzu como p´Asturies, que tendrié asina una salida al noroeste de la península Ibérica. D´aquesta infraestructura, pola que solo puxa Unión del Pueblo Leonés (UPL), namás hai feichos diez kilómetros de vía urbana ente Ponferrada ya Cubiellos ya outros diez d´autovía ente aquesti conceyu ya Turenu.
L´alcalde de Páramu, Ángel Calvo, ya la sua ñera de Vil.lablinu, Ana Luisa Durán, marchoron del Menisteriu de Fomento igual que chegoron. “Nin sí, nin non, nin tolo contrariu”, dixo´l de Ribas del Sil tres el caleyu con Victor Morlán, quien cuntóu “qu´estudiarié l´alegación” que-ye presentoron. Dende la Secretariya d´Estáu encamentóuse-yes a la revisión del PEIT, albedriáu pa la primavera del añu que vien, onque Calvo manifestóu el sou determín de “provocar más caleyos” enantias ente qu´Ana Durán s´esfoutóu en dare “griesca a unos ya outros”. L´alministración autonómica de Castiella ya Llión, mentanto, endílga-ye la responsabilidá al estáu, ya que l´autovía “amesta duas comunidades autónomas”.

Cristiano Ronaldo enchena´l Bernabéu

2009-07-08T18:58:00.003+02:00

Una tarde soleyeira por demás nun foi enguedeyu dengunu pa que 80000 presonas s´apetiguñaran na redondada del Santiago Bernabéu. Superóronse las cifras de la presentación de Kaká la selmana anterior ya inclusive las del estadiu San Paolo de Nápoles, qu´en 1984 viou chegare a Maradona. Dientro del templu madridista namás quedóu valeira una parte de las gradas, que taban n´obras, ya las que taban xusto detrás de la pantalla xigante.
A las 19:00 abrióronse las puertas ante la vexilancia de mil axentes de segurancia, ya fasta las 21:00 amosóronse a los aficionaos brancos las meyores imaxes de la hestoria del club ya de Cristiano Ronaldo, tanto cola camiseta de la selección pertuesa como cola del Manchester United. Trés d´eillo, coyíu´l micrófonu Florentino Pérez, que saltara al estráu col arimu del director del club, Jorge Valdano, del presidente d´honor Alfredo di Stefano ya del que foi gran xugador del Benfica, Eusebio.
El presidente del Real Madrid, que foi cuasi tan allabanciáu como´l propiu xugador pertués, presentóu al estremu como un xugador que yía a “aniciare ilusiones ya sueños en tolos aficionaos del mundu”, ya diou pasu a la estrella del Madrid del añu que vien. Los berríos de “sí, sí, sí, Cristiano ya ta eiquí” recibioron a Ronaldo, quien s´amosóu dalgo avergoñáu pola cantidá de xente ya zarróu l´actu col afamáu “Hala Madrid”.

Porsche remestura berlina ya coupè col Panamera

2009-07-03T06:20:00.015+02:00

Tien el xeitu de Porsche pero val p´andare de serendín cola familia. Asocede igual que cuando ñacíu´l Cayenne, qu´empobinóu las señas d´identidá de la robra qu´anicióu Ferdinand p´hacia un modelu de carácter prácticu. Entoncias houbo quien albedrióu´l torniscazu de los de Stuttgart por aquesta apuesta, onque ceo se barruntóu, por mor del éxito del SUV, que s´equivocaba por demás. Camiéntase qu´ocurra lo mesmu col Panamera, costruyíu en Leipzig, ya del que Porsche quier vendere unas ventemil unidades al añu.

Magar de l´altura del vehículu (1,4 m) ya de que nu puestu de conducción se ta igual que nun 911, los inxenieros trabayoron aesgaya pa que l´espaciu interior del Panamera seya unu de los sous puntos fuertes, igual delantre que detrás. La consola central, qu´estrema al conductor del acompañante, prollóngase fasta los asientos traseiros ya tien una confeguración nueva con respectu a los sous harmanos de gama, encrinada p´hacia la elegancia enverde pa la deportividá.

Presta afalalu tanto como´l 911. Parte de la culpa tienla´l motor d´ochu celindros ya 4,8 litros yá cuñecíu del Cayenne, onque soncemente remocicáu pa podere inxerilu nu Panamera: l´anchura de 1,93 m fizo que Porsche refugara los motores boxer pal sou nuevu modelu. Pola sua parte´l pesu d´aquesti vehiculu abállase ente 1,8 ya 2 t, onque eillo nun supón torga denguna pa que´l Panamera vaiga siempres ensin perdere la sua buelga. Las versiones de tracción total van entovía meyor, como si foran pegadas al esfaltu.
El consumu acóutase por mor del sistema d´arranque ya parada automáticu, la meyora na xestión llectrónica de los motores ya l´alerón que furrula de miente automática dende los 90 km/h. Entovía quedan versiones por asoleyare: un V6, un diesel ya, inclusive, un híbridu. Fasta que chegue´l seis celindros hai qu´aportare 105000 euros pa mercare´l Panamera más baratu ya 150000 si se quier el Turbu. Las versiones con tracción total suponen cuasi 10000 euros a mayores. Outra tema yía´l de las opciones: 1100 euros pola pintura metalizada ya 10000 polos frenos cerámicos.

La CE rebaxa las tarifas del móvil

2009-07-03T04:04:00.003+02:00

La Comisión Europeya aprobóu encurtiare el preciu de las chamadas, l´envíu de SMS´s ya la descarga de datos, cola fin de que los costes d´itinerancia baxen nun 60% a los consumidores. Ensegún Martin Selmayr, voceiru de Telecomunicaciones, las nuevas tarifas tarán encesas de miente automática, ensin que los crientes tengan que facere un nadín.
De magar el postreiru die unu de santa marina, las chamadas a outros estaos de la Xunión nun van xubire de los 0,43 euros por minutu, diendo l´IVA a mayores. Amás los operadores tan obrigaos a facturar por segundos dende´l primer mediu minutu. Fasta 2011 el coste dirá amenorgando entovía más, siendo´l llinde de 0,39 euros en 2010 ya de 0,35 dientro de dóus años. Mentanto´l coste de los mensaxes de testu va sere d´once céntimos ensin IVA.
Aquesto supón que l´emplegu del serviciu de mensaxería curtia seya más caru dientro d´España qu´a nivel europeyu. Poro, FACUA encamienta al gobiernu qu´afite tarifas másimas a las operadoras de telecomunicaciones.

Opel va esgayase de GM

2009-05-31T11:56:00.015+02:00

Sede d´Adam Opel GmbH (Rüsselsheim)

Dientro d´un mes remataráse l´alcuerdu pol que la compañía canadiense de componentes Magna International Inc (la terceira del mundiu na sua estaya) va mercare Opel, cola fin de ponere en cobru a l´anguaño filial de GM ante l´amenaza d´escachadura del grupu GM. Pola sua parte, los 55.000 emplegaos del consorciu norteamericanu n´Europa ya la ucena d´estaos afectaos oureyan al resultáu de las conversas allindadas pol gobiernu federal alemán, finadas aquesti sábadu.
Los pegollos del alcuerdu son la inxertadura de lliquidez a Opel ya la sua costitución en miente de fiducia, que tará encesa fasta 2014. Las alministraciones xermanas avalarán empréstamos por valor de 4500 milllones d´euros, ente que Magna ya la caxa d´aforros rusa Sberbank van inxirire 700 millones. Dineiru del que GM, que mantendrá un 35% de la sociedá que s´anicie, nun va vere nin una perra. Angela Merkel manifestóu que l´obxetivu yía “creyare una empresa europeya embaxo´l parauguas d´Adam Opel”.
El pieche del tratu supón l´esfarrapie d´once mil puestos de trabayu ya l´esmolecimientu de los menistros d´Industria, que pían a la Comisión Europeya porque tolos estaos seyan gustantes colas axudas que s´aporten ya las mididas que se tomen. Aquestas nun deben dire a la escontra de las reglas de competencia nin previlexare unas factorías frente a outras.

El balumbu del meyor arquitectu

2009-05-30T11:58:00.009+02:00

Cúpula del Reichstag (Berlín)

El xuráu de la Fundación Príncipes d´Asturies encalcóu “l´orixinal domiñu del espaciu, la lluz ya la materia” de Norman Foster p´apurri-ye´l galardón uvieín de las Artes. La Fundación tamién allabancia la calidá ya l´enclín pola innovación de los sous proyectos que, al tiempu, son gustantes col desenvolvimiento sostenible. Pola sua parte, l´arquitectu inglés cuntóu que´l premiu yía “una maraviyosa recuñecencia de la importancia del diseñu como afalador de la meyora de la calidá de vida”.
Foster ñacíu en 1935 en Manchester, onde escomencióu los sous estudios nuversitarios que rematóu en Yale, ya en 1965 anicióu´l primer estudiu de sou. Escurque seya unu de los poucos arquitectos que tien un xeitu afitáu, naquesti casu´l high tech, que foi apolizando col pasu de los años ya pon tolos sous esfoutos en facere que l´arquitectura acompangue colas necesidades de la xente.
Las oubras de Norman Foster, que tamién dispón del premiu Pritzker d´arquitectura, espúrrense por tol mundiu, dende las torres Hearst ou Gherkin en Nueva York ya Llondres, fasta la ponte francesa de Milleau, pasando pol mayor aeropuertu, allugáu en Pekín. El sou bon facere explica que la sua sociedá, Foster & Partners seya anguaño una de las más rentables.

Un celebru artificial

2009-05-06T06:14:00.005+02:00

El furmientu del proyectu escomencióu en 2005, cuando L´École Polytechinque Fédérale de Lausanne (Suiza) ya IBM asoleyoron la sua facendera pa creyare un modelu funcional de celebru, chamáu Blue Brain. Aquesti aporta una ferramienta cola que, al través d´imaxes ya simulaciones, la comunidá científica yía quien a esqueirare los vezos ya´l desenvolvimiento del celebru.
Anguaño los investigadores ya foron a aniciare una pequeña fasteira del órganu ya cuntan que pal 2010 teya fináu´l neocórtex. Blue Brain furrula de miente semeyada a los simuladores de vuelo usaos n´aeronáutica ya tien la fin de pescudare como furrula´l celebru en situaciones de enfermedá, como las que se dan en casos d´esquizofrenia, autismu, alzheimer, depresión ou parkinson.
Blue Brain emplega´l sistema d´inxeniería inversa. Aquesto supón atropare información d´un productu yá rematáu que se va desaniciando fasta afallare de quéi ta feichu, quéi lu fai furrulare ya como foi creyáu.

Google axeitará los xardines con cabras

2009-05-05T04:06:00.003+02:00

Google arrebatíu´l sou ritmu de contratación d´emplegaos por mor de la crisis económica, pero nos postreiros dies golvíu a nantare la plantiella con duascientas cabras, cola fin de bouzare´l tapín de la sede de Mountain View, nu Silicon Valley.
Dan Hoffman, responsable Inmobiliariu ya d´Espaciu de Trabayu de la compañía de servicios d´internet, cuida que-yes val más alquilare “dalgunas cabras” enverde usare las ruidosas máquinas d´esveirare que “furrulan con gasolina ya contaminan”.
Pola sua parte, l´Asociación Protectora d´Animales d´EEXX esmolezse polas condiciones nas que se tresporta a los animales a la sua “xeira” ou por si tienen onde abellugase si hay mal tiempu. Tou eillo porque Yahoo ou l´untamientu de San Francisco, faen usu d´aquesti serviciu p´acuriosare los verdines de sóu.

Windows 7, cuasi rematáu

2009-05-02T21:51:00.002+02:00

De magar el 5 de mayu podráse descargare la versión de pruebas de la postrer versión del afamáu sistema operativu de Microsoft, que pon asina los pegollos pal asoleyamientu de Windows 7. Aquesta versión columbra la fin de Windows Vista, la versión entovía vixente ya enxitada por un cientu d´usuarios.
Las duas prencipales torgas que ponié Vista yeran la falta de compatibilidá con drivers abondo ya con bien d´aplicaciones anteriores a él, ya´l puxu que-ye esixe al PC nu que teya afitáu. Agora Microsoft aporta abondas entendederas al nuevu Windows, de miente tala que será a atolenare controladores aesgaya ya executará aplicaciones de Windows XP.
Al tiempu, Windows 7 furrula curiosamente colas especificaciones de las que disponen los PC´s d´anguaño ya, inclusive, xínglase una versión embobinada pa netbooks que dexa trabayare con un másimu de trés aplicaciones.

Weimar festeixa´l cabu d´añu de la Bauhaus

2009-04-09T19:17:00.002+02:00

La Bauhaus en Dessau

La ciudá del estáu xermanu de Thüringen reguníu mil duascientas piezas pa remembrare la nacencia del movimientu artísticu Bauhaus va noventa años. La Fundación Clásica de Weimar fizo´l llabor d´atropare las oubras cume d´aquesta escuela cola fin d´afitare´l programa cultural Das Bauhaus kommt (Chega la Bauhaus).
El presidente de la fundación, Hellmut Seeman, quier que quede nidiu por demás que foi Weimar el furmientu de la Bauhaus (aniciada pol arquiteutu Walter Gropius), onque espués asitiara en Berlín ya Dessau.

Bien de llugares coyerán el testigu de Weimar tres el cinco de santa marina con un cientu d´actos, ente eillos, el MOMA de Nueva York. La ciudá norteamericana abellugóu la Bauhaus tres el pieche del centru de Berlín ordenáu por Hitler en 1933, lo que nun fizo qu´el movimientu artísticu murriera, antigual, yá qu´espurríu´l sou xacer por tol mundiu occidental.

La Bauhaus en Wikipedia

Los vidioxuegos van considerase cultura

2009-04-03T19:49:00.005+02:00

Need For Speed Undercover (PS3)

L´aniciu de vidioxuegos algamóu´l rango d´industria cultural por mor d´una iniciativa de la Comisión de Cultura del Congresu de los Deputaos. Asina allúgase a l´altura del cine, la música ou las artes plásticas ya vei recuñecida la sua puxanza económica ya creyativa.
Tolos grupos políticos foron gustantes cola propuesta del grupu Socialiegu, pa qu´el sector seya a recibire axudas pa la promoción ya la financiación de los sous productos, ya cola ideya del grupu Popular pa que los vidioxuegos teyan inxeríos nu plan de sofitu a las industrias culturales del Gobiernu.
Reblagu a reblagu los vidioxuegos tan xamandose´l pastel del sector audiovisual. Si se pon la vista en 2005, el contraste yía nidiu. Aquesi añu las ventas de música ya DVD yeran un 39 % del total, pero yá en 2008 yes-tocóu menos de la mitá (un 18%). La taquilla de cine caltién el sou 25 %. Mentanto, los vidiuxuegos espúrrense: d´un 35% pasoron a un enveyable 57%.

L´allume del settecento venecianu

2009-04-03T16:05:00.011+02:00

Piazza de San Marcos (Canaletto)

El settecento foi un sieglu críticu pa la República veneciana. Foi un momentu no que l´allume s´apaga ya escomienza una dómina de decadencia política, económica ya social onque l´arte vive un momentu bayurosu por demás. A lo llongu del sieglu XVIII, Venecia cuñecíu sobro cien artistas consideraos güei grandes mayestros, como Tiepolo, Canaletto, Ricci, Guardi ou Cimaroli. El settecento espurríu asina una ponte col cinquecento de Tintoretto ya Tiziano.
L´Academa de Bellas Artes de San Fernando de Madrí abríu´l mes pasáu la esposición Settecento veneciano. Del barroco al neoclasicismo, qu´amuesa 57 llienzos consideraos oubras cume d´aquesta dómina, que foron apurríos por estituciones ya collecciones privadas d´Italia. Poro, bien d´eillas enxamás s´asoleyoron n´España.
La comisaria de la esposición, Analiza Scarpa, esplica que la importancia de los mayestros del settecento ta na miente de tratare´l lluz ya´l culor. La lluz remana siempres del centru del cuadru p´hacia l´espectador, ente que las pinceladas de culor anician las feguras.
La exposición organízase alredor de duas grandes estayas: paisaxes de Venecia ya temas relixosas remesturadas con escenas del campu. Na primeira aléntanse las imaxes d´aquesta guapa ciudá va trés sieglos: la plaza San Marcos, el Palaciu Ducal, Santa Mariya de la Salú ou l´Academia. El xeitu paisaxista del settecento fai que cada requeixu venecianu, colas suas plazas ya las suas fontes seya retratáu de miente fonda.

Vocabulario de Noceda

2009-04-01T20:44:00.003+02:00

El Colectivo Cultural "La Iguiada" de Noceda, con el sofitu del Patronato de Turismo del Consejo Comarcal del Bierzo, editó un número especial de “La Curuja” dedicado íntegramente al vocabulario autóctono del concejo de la sierra de Xistréu. "La Iguiada" es una asociación cultural que tiene como objetivo promover y difundir la cultura y la historia de Noceda y su xente, por ejemplo, mediante la publicación de la revista “La Curuja”. Manuel Cuenya, coordinador de la revista y autor del trabajo de recogida de vocabulario, del que se editaron 300 ejemplares, se encargó de su presentación en la Casa de las Culturas de Bimbibre.
El autor peca de profano al asociar algunos vocablos a outru dominio lingüístico o al definir otros términos como “deformación” o “corrupción” de sus equivalentes en español por su parecido, a pesar de que en la mayor parte de los casos derivan directamente del latín. Ello no debe empañar la loable llabor que supone recopilar vocabulario en cualquier parte del dominio lingüístico, para poder conocerlo aún más y para poder continuar la recuperación de la lengua.
La abundanza de diptongos crecientes y decrecientes, la presencia de la palatalización de la "l" inicial latina o la transformación de los grupos iniciales "cl", "pl" y "fl" en "ch" no hace sino asitiare al Bierzo Alto dentro del subdialecto berciano-senabrés, viéndose influido, al mismo tiempo, de los usos de Omaña, Ribas del Sil o Toreno.

Conceyu de Noceda

Asociación Cultural "La Iguiada"

Presentación de "Vocabulario de Noceda"

Entrevista a Miguel Cuenya

Descarga "Vocabulario de Noceda"

Enguapecíu´l Clas E

2009-03-31T20:03:00.003+02:00

Como tolos que lu precedioron, el nuevu Clas E, la berlina grande de la robra de Stutgart, pasma pol sou confort de marcha. Anda como si esñalara sobro l´esfaltu, afalándose en sutruyu dafeichu. El modelu de 2009, la outava xeneración d´aquesti turismu de luxu, destaca tamién pol diseñu, asoleyando una nueva delantreira con cuatru faros cuadraos qu´emprincipia una llínia más deportiva, apolizando asina la sua fegura. D´igual miente, l´interior tien inxeríu un salpicadeiru más modernu. El resultáu nun alteria la sua elegancia de siempres ya apurre-ye xeitu por demás.

L´amenorgadura del consumu yía outra de las grandes novedades: los motores, que gastan fasta un 23% menos que nu modelu d´enantias, acomuñan col paquete BlueEfficiency qu´aguya l´aforru de combustible. Las meyoras na aerodinámica del vehículu fain que merme´l consumu a 130 km/h en 0,25 litros al respective del modelu al que sostituye.

El nuevu Clas E salíu a la venta n´España el 26 de marzu, con precios qu´escomencipian nos 38500 euros del 200 CDi. Nun entamu habrá cincu motores, trés d´eillos CDi turbodiesel (220, 250 ya 350, con 170, 204 ya 231 CV cadagunu) ya dous de gasolina: el 350 CGi d´indición direuta, qu´aporta 292 CV ya´l 500 d´ochu celindros en V. La ufierta medrará en setiembre cola chegada de trés versiones más: 200 CDi de 136 CV ya 200 ya 250, dambos de gasolina, qu´apurren 184 ya 204 CV respectivamente. Yá pa noviembre tará nu mercáu la carrocería familiar.
Tocante a la segurancia, el Clas E de 2009 cunta con siete airbag, lluces ya suspensiones activas, sistema Presafe qu´enterria los cinchos si se barrunta riesgu d´acidente, dispositivos de control de l´atención del conductor por si s´apalumba ou-ye da soñapera, cámaras que recuñecen las señales de velocidá, ya´l sistema Distronic Plus: el control de velocidá que caltién la distancia más afayadiza col vehículu que va delantre, faciendo las veces de pilotu automáticu nos atascos.

Site de Mercedes-Benz

Güelven Epi ya Blas

2009-03-24T12:15:00.003+01:00

¿Quién nun cuñez a Epi ya Blas? ¿Quién nun remembra al mostruu de las galletas xamando en tontura? ¿Dalguién de la mocedá esqueicíu cómo Coco-yes adeprendíu la difrencia ente cerca ya llonxe? Trenta ya trés años espués de la sua primer emisión n´España, Barrio Sésamo torna a TVE, ya va entitulase Juega conmigo Sésamo. Escomencióu aquesta selmana (asoléyase de llunes a vienres, de magar las 8:00) ya va inxertáu dientro del espaciu Los Lunnis na segunda canal de TVE. Asina los pequeños espectadores d´anguaño serán a esfrutare de los muñacos de Jim Henson d´igual miente que ficioron sous pas.
Juega conmigo Sésamo yía l´adaztación n´España de Play with me Sesame, que convida a l´audencia menuda a cantare, baillare, xugare ya adeprendere con Epi, Blas, Coco, Peggy, el Mostruu de las Galletas ya´l restu de los sous amorousos amigos de peluche. El programa remesturará las reposiciones de capítulos d´antaño con xuegos educativos qu´aguyarán la llectura ya las matemáticas, asina como la creatividá de los neños.
Barrio Sésamo yía´l decanu de los programas infantiles n´España. Ñacíu en 1975 como Ábrete Sésamo, versión tornada de Sesame Street, serie estauxunidense qu´emprincipióu en 1969 ya que desembarcóu en más de 120 países. Cuntaba a los neños las abadías de los muppets, las llanudas criaturas maxinadas por Jim Henson. Espués, l´espaciu anicióu los sous propios muñacos, como la pita Caponata, el llumiacu Perezh.il ya l´ourizu Espinete.

Pal 2050 yá seremos 9000 millones de presonas

2009-03-20T06:34:00.003+01:00

La población mundial, qu´anguaño yía de 6800 millones de presonas, nantará nun 49,6% más qu´en 2000, ensegún las estimaciones feichas pola ONU. Cuasi tol aumentu mundial asocederá nos países en desenvolvimientu, cuya población actual (5600 millones) medrará n´outros 2300 millones de presonas. La mitá d´aquesti crecimientu tendrá llugar namás en nueve estaos: India, Pakistán, Nixeria, Etiopía, Estaos Xunios, Congu, Tanzania, China ya Bangladesh. Tanzania será, en ñúmberos relativos, el que más aumentará (un 220%), ya India superará en población a China (1600 frente a 1400 millones). Los países desenrollaos malpenas xuben (de los 1230 millones d´anguaño a los 1280 millones que s´albedrian pa mediaos de sieglu), onque sinón fora pola migración dende las fasteiras probes del planeta, la sua población amenorgarié a 1150 millones.
La cantidá de presonas n´edá de másima productividá llaboral, ente 25 ya 59 años, ta agora en cifras record, tanto n´ocidente (605 millones) como nu restu del mundiu (2500 millones). El ñúmberu s´entrullará dientro de poucos años nu primer mundiu, pero siguirá xubiendo nos países en desenvolvimientu, fasta algamare los 3600 millones de presonas a mediaos de sieglu. Asina ya tou, la estaya d´edá que más va medrare en tol planeta yía la de los mayores de 60 años. Namás nu mundiu ricu, las presonas d´aquesa edá pasarán de los 264 millones d´anguaño a los 416 millones xinglaos pal añu 2050, onque l´avieyamientu va sere bultable por demás nos países en desenvolvimientu, onde las presonas d´edá de 475 a 1600 millones.